‘ਦੋ ਦੂਣੀ ਚਾਰ’ ਦੀ ਰਿਲੀਜ਼ 8 ਅਕਤੂਬਰ ਨੂੰ

ਹਿੰਦੀ ਸਿਨੇਮਾ ਵਿੱਚ 70 ਦੇ ਦਹਾਕੇ ਦੀ ਪ੍ਰਸਿੱਧ ਜੋੜੀ ਰਿਸ਼ੀ ਕਪੂਰ ਅਤੇ ਉਸ ਦੀ ਪਤਨੀ ਨੀਤੂ ਸਿੰਘ ਨੂੰ ਲੈ ਕੇ ਬਣਾਈ ਗਈ ਵਾਲਟ ਡਿਜ਼ਨੀ ਦੀ ਫਿਲਮ ‘ਦੋ ਦੂਣੀ ਚਾਰ’ 8 ਅਕਤੂਬਰ ਨੂੰ ਰਿਲੀਜ਼ ਹੋਵੇਗੀ। ਪਲੈਨਮੈਨ ਮੋਸ਼ਨ ਪਿਕਚਰਜ਼ ਵਲੋਂ ਬਣਾਈ ਗਈ ਇਸ ਫਿਲਮ ਦਾ ਨਿਰਦੇਸ਼ਨ ਹਬੀਬ ਫੈਜ਼ਲ ਨੇ ਕੀਤਾ ਹੈ, ਜੋ ਕਿ ਮੱਧ ਵਰਗੀ ਪਰਵਾਰ ਦੀ ਕਹਾਣੀ ਹੈ। ਹਿੰਦੀ ਫਿਲਮਾਂ ਦੀ ਇਹ ਪ੍ਰਸਿੱਧ ਜੋੜੀ 30 ਸਾਲ ਮਗਰੋਂ ਵੱਡੇ ਪਰਦੇ ‘ਤੇ ਅਹਿਮ ਕਿਰਦਾਰਾਂ ਵਿੱਚ ਪਰਤ ਰਹੀ ਹੈ। ਇਸ ਤੋਂ ਪਹਿਲਾਂ ਇਮਤਿਆਜ਼ ਅਲੀ ਦੀ ‘ਲਵ ਆਜ ਕਲ’ ਵਿੱਚ ਰਿਸ਼ੀ ਕਪੂਰ ਨਾਲ ਨੀਤੂ ਦਾ ਛੋਟਾ ਜਿਹਾ ਕਿਰਦਾਰ ਸੀ।
ਵਾਲਟ ਡਿਜ਼ਨੀ ਸਟੂਡੀਓਜ਼ ਇੰਟਰਨੈਸ਼ਨਲ ਪ੍ਰੋਡਕਸ਼ਨ (ਇੰਡੀਆ) ਦੀ ਕਾਰਜਕਾਰੀ ਨਿਰਦੇਸ਼ਕ ਸਵਾਤੀ ਸ਼ੈਟੀ ਨੇ ਦੱਸਿਆ ਕਿ ਇਹ ਫਿਲਮ ਦਿਲਾਂ ਨੂੰ ਟੁੰਬਣ ਵਾਲੇ ਅਹਿਸਾਸ ਦੀ ਬਣਾਈ ਗਈ ਹੈ, ਜੋ ਹਰ ਭਾਰਤੀ ਟੱਬਰ ਨੂੰ ਸਮਝ ਆਵੇਗੀ ਅਤੇ ਇਸ ਦੇ ਪਾਤਰਾਂ ਨਾਲ ਤੁਹਾਨੂੰ ਪਿਆਰ ਹੋ ਜਾਵੇਗਾ। ਫਿਲਮ ਦੁੱਗਲ ਪਰਵਾਰ ਦੇ ਆਲੇ ਦੁਆਲੇ ਘੁੰਮਦੀ ਹੈ, ਜਿਨ੍ਹਾਂ ਦੀ ਰੋਜ਼ਮੱਰਾ ਦੀ ਜ਼ਿੰਦਗੀ ਨੂੰ ਦਰਸ਼ਕ ਦੇਖਣਾ ਪਸੰਦ ਕਰਨਗੇ। ਫਿਲਮ ਇੱਕ ਮੱਧ ਵਰਗੀ ਪਰਵਾਰ ਦੇ ਸੁਪਨੇ ਨੂੰ ਸਕੂਟਰ ਤੋਂ ਕਾਰ ਖਰੀਦਣ ਦੀ ਸੋਚ ਨਾਲ ਪ੍ਰਦਰਸ਼ਿਤ ਕਰਦੀ ਹੈ।