Punjab Star » ਕੈਨੇਡਾ

ਪੋਲੈਂਡ ਤੋਂ ਆਪਣੇ ਬੱਚਿਆਂ ਨੂੰ ਕੈਨੇਡਾ ਲਿਆਉਣ ਲਈ ਫਿਕਰਮੰਦ ਹੈ ਪਿਤਾ

editor — Mon, 14 May 2012 15:59:39 +0000

ਟੋਰਾਂਟੋ, 14 ਮਈ - ਢਾਈ ਸਾਲ ਦੀ ਭਾਲ ਤੋਂ ਬਾਅਦ ਆਪਣੇ ਲਾਪਤਾ ਬੱਚਿਆਂ ਨੂੰ ਪੋਲੈਂਡ ਵਿੱਚ ਲੱਭ ਲੈਣ ਵਾਲੇ ਓਨਟਾਰੀਓ ਦੇ ਵਿਅਕਤੀ ਦਾ ਹੁਣ ਸਾਰਾ ਜੋ਼ਰ ਉਨ੍ਹਾਂ ਨੂੰ ਕੈਨੇਡਾ ਲਿਆਉਣ ਉੱਤੇ ਲੱਗਿਆ ਹੋਇਆ ਹੈ। ਸਟੀਫਨ ਵਾਟਕਿਨਜ਼ ਨੇ ਐਤਵਾਰ ਨੂੰ ਦੱਸਿਆ ਕਿ ਉਹ ਬੁੱਧਵਾਰ ਨੂੰ ਵਾਰਸਾਅ ਅਦਾਲਤ ਵਿੱਚ ਪੇਸ਼ ਹੋਵੇਗਾ ਤੇ ਆਪਣੇ 10 ਸਾਲਾ ਲੜਕੇ ਅਲੈਗਜੈ਼ਂਡਰ ਤੇ 8 ਸਾਲਾ ਕ੍ਰਿਸਟੋਫਰ ਨੂੰ ਕੈਨੇਡਾ ਲਿਆਉਣ ਲਈ ਪੂਰੀ ਵਾਹ ਲਾਵੇਗਾ। 40 ਸਾਲਾ ਨਿਊਮਾਰਕਿਟ, ਓਨਟਾਰੀਓ ਵਾਸੀ ਇਸ ਵਿਅਕਤੀ ਨੂੰ ਆਪਣੀ ਪਤਨੀ ਐਦਿਤਾ ਵਾਟਕਿਨਸ ਨਾਲੋਂ ਵੱਖ ਹੋਣ ਮੌਕੇ ਆਪਣੇ ਦੋਵਾਂ ਬੱਚਿਆ ਦੇ ਪਾਲਣ ਪੋਸ਼ਣ ਦੀ ਜਿੰ਼ਮੇਵਾਰੀ ਮਿਲੀ ਸੀ। ਪਰ ਉਸ ਦੀ ਪਤਨੀ ਤੇ ਬੱਚੇ ਅਚਾਨਕ ਮਾਰਚ 2009 ਵਿੱਚ ਗਾਇਬ ਹੋ ਗਏ ਤੇ ਉਹ ਹੁਣ ਜਾ ਕੇ ਉਸ ਦੀ ਪਤਨੀ ਦੇ ਜਨਮ ਸਥਾਨ ਪੋਲੈਂਡ ਤੋਂ ਉਸ ਨੂੰ ਲੱਭ ਗਏ ਹਨ। ਪਰ 15 ਦਸੰਬਰ ਨੂੰ ਪੋਲੈਂਡ ਦੀ ਅਦਾਲਤ ਨੇ ਲੜਕਿਆਂ ਨੂੰ ਕੈਨੇਡਾ ਵਾਪਿਸ ਭੇਜਣ ਤੋਂ ਇਨਕਾਰ ਕਰ ਦਿੱਤਾ। ਹੁਣ ਵਾਟਕਿਨਜ਼ ਉਸ ਫੈਸਲੇ ਦੇ ਖਿਲਾਫ ਅਪੀਲ ਕਰ ਰਿਹਾ ਹੈ। ਅਦਾਲਤ ਨੇ ਇਹ ਫੈਸਲਾ ਇਸ ਬਿਨ੍ਹਾ ਉੱਤੇ ਸੁਣਾਇਆ ਹੈ ਕਿ ਇਹ ਬੱਚੇ ਹੁਣ ਪੂਰੀ ਤਰ੍ਹਾਂ ਪੋਲੈਂਡ ਦੇ ਹਿਸਾਬ ਨਾਲ ਢਲ ਚੁੱਕੇ ਹਨ ਇਸ ਲਈ ਇਨ੍ਹਾਂ ਨੂੰ ਕੈਨੇਡਾ ਲਿਜਾਇਆ ਜਾਣਾ ਨੁਕਸਾਨਦੇਹ ਹੋ ਸਕਦਾ ਹੈ। ਪਰ ਵਾਟਕਿਨਜ਼ ਦਾ ਦਾਅਵਾ ਹੈ ਕਿ ਉਨ੍ਹਾਂ ਦੇ ਲੜਕੇ ਪੋਲੈਂਡ ਦੀ ਜ਼ੁਬਾਨ ਨਾਲੋਂ ਅਜੇ ਵੀ ਅੰਗਰੇਜ਼ੀ ਵਧੇਰੇ ਚੰਗੀ ਤਰ੍ਹਾਂ ਬੋਲ ਲੈਂਦੇ ਹਨ। ਉਸ ਨੂੰ ਅਜਿਹੀਆਂ ਕੈਨੇਡੀਅਨ ਏਜੰਸੀਆਂ ਦਾ ਸਮਰਥਨ ਵੀ ਹਾਸਲ ਹੈ ਜਿਹੜੀਆਂ ਉਨ੍ਹਾਂ ਦੇ ਬੱਚਿਆਂ ਨੂੰ ਨਿਊਮਾਰਕਿਟ ਸਥਿਤ ਉਸ ਦੇ ਘਰ ਮੁੜ ਵੱਸਣ ਵਿੱਚ ਮਦਦ ਕਰਨਗੀਆਂ। ਉਸ ਨੇ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਨੂੰ ਇਹ ਮੁੱਦਾ ਪੋਲੈਂਡ ਦੇ ਆਪਣੇ ਹਮਰੁਤਬਾ ਅਧਿਕਾਰੀ ਡੌਨਡਲ ਟਸਕ ਕੋਲ ਉਸ ਸਮੇਂ ਉਠਾਉਣ ਲਈ ਵੀ ਆਖਿਆ ਹੈ, ਜਦੋਂ ਦੋਵੇਂ ਆਗੂ ਇਸ ਹਫਤੇ ਓਟਵਾ ਵਿੱਚ ਮੁਲਾਕਾਤ ਕਰਨਗੇ।

ਗੁਇਰਜਿਸ ਵੱਲੋਂ ਠੋਕੇ ਗਏ ਨਿਰਰਥਕ ਕੇਸ ਨੂੰ ਖਾਰਜ ਕਰਨ ਲਈ ਹਾਰਪਰ ਨੇ ਅਦਾਲਤ ਨੂੰ ਦਿੱਤੀ ਅਰਜ਼ੀ

editor — Sat, 12 May 2012 14:19:43 +0000

ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਨੇ ਸੁੱ਼ਕਰਵਾਰ ਨੂੰ ਅਦਾਲਤ ਵਿੱਚ ਅਰਜ਼ੀ ਪੇਸ਼ ਕਰਕੇ ਇਹ ਬੇਨਤੀ ਕੀਤੀ ਹੈ ਕਿ ਹੈਲੇਨਾ ਗੁਇਰਜਿਸ ਵੱਲੋਂ ਉਨ੍ਹਾਂ ਖਿਲਾਫ ਕੀਤਾ ਗਿਆ ਨਿਰਰਥਕ ਕੇਸ ਖਤਮ ਕੀਤਾ ਜਾਵੇ। ਅਦਾਲਤ ਵਿੱਚ ਪੇਸ਼ ਕੀਤੇ ਗਏ ਦਸਤਾਵੇਜ਼ਾਂ ਵਿੱਚ ਆਖਿਆ ਗਿਆ ਹੈ ਕਿ ਗੁਇਰਜਿਸ ਵੱਲੋਂ ਕੀਤਾ ਗਿਆ ਕੇਸ ਨਿਰਰਥਕ ਤੇ ਦੁਖਦਾਈ ਹੈ ਇਸ ਲਈ ਇਸ ਨੂੰ ਖਾਰਜ ਕੀਤਾ ਜਾਵੇ। ਦਸਤਾਵੇਜ਼ ਵਿੱਚ ਦਰਜ ਹੈ ਕਿ ਅਪਰੈਲ 2010 ਵਿੱਚ ਪੈਦਾ ਹੋਏ ਵਿਵਾਦ ਮਗਰੋਂ ਮੰਤਰੀ ਮੰਡਲ ਤੋਂ ਅਸਤੀਫਾ ਦੇਣ ਤੋਂ ਇੱਕ ਸਾਲ ਬਾਅਦ ਮਈ 2011 ਵਿੱਚ ਹੈਲੇਨਾ ਗੁਇਰਜਿਸ ਨੇ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਖਿਲਾਫ ਕੈਨੇਡਾ ਦੇ ਹਿਊਮਨ ਰਾਈਟਸ ਕਮਿਸ਼ਨ ਕੋਲ ਸਿ਼ਕਾਇਤ ਦਰਜ ਕਰਵਾਈ ਸੀ। ਪਰ ਇਹ ਮਾਮਲਾ ਸਿਰੇ ਨਹੀਂ ਚੜ੍ਹ ਸਕਿਆ ਤਾਂ ਫਿਰ ਗੁਇਰਜਿਸ ਨੇ ਕੇਸ ਦਰਜ ਕਰਵਾ ਦਿੱਤਾ। ਇਸ ਕੇਸ ਨੂੰ ਨਿਰਮੂਲ ਦੱਸਦਿਆਂ ਹੋਇਆਂ ਇਸ ਨੂੰ ਖਾਰਜ ਕੀਤੇ ਜਾਣ ਦੀ ਹਾਰਪਰ ਵੱਲੋਂ ਉਦੋਂ ਮੰਗ ਕੀਤੀ ਗਈ ਹੈ ਜਦੋਂ ਇਸ ਤਰ੍ਹਾਂ ਦੀ ਹੀ ਇੱਕ ਹੋਰ ਅਰਜ਼ੀ ਹਾਰਪਰ ਦੇ ਸਾਬਕਾ ਚੀਫ ਆਫ ਸਟਾਫ ਗਾਇ ਗਿਓਰਨੋ ਵੱਲੋਂ ਅਦਾਲਤ ਵਿੱਚ ਦਿੱਤੀ ਗਈ ਸੀ। ਗਿਓਰਨੋ ਉੱਤੇ ਵੀ ਗੁਇਰਜਿਸ ਨੇ ਕੇਸ ਠੋਕਿਆ ਹੋਇਆ ਹੈ। ਹਾਰਪਰ ਵੱਲੋਂ ਦਰਜ ਅਰਜ਼ੀ ਕਿਰਤ ਮੰਤਰੀ ਲੀਜ਼ਾ ਰਾਇਤ, ਕੰਜ਼ਰਵੇਟਿਵ ਐਮਪੀ ਸੈ਼ਲੀ ਗਲੋਵਰ ਤੇ ਹਾਰਪਰ ਦੇ ਪ੍ਰਿੰਸੀਪਲ ਸਕੱਤਰ ਰੇਅ ਨੋਵਕ ਦੇ ਪੱਖ ਉੱਤੇ ਵੀ ਦਰਜ ਕਰਵਾਈ ਗਈ ਹੈ ਕਿਉਂਕਿ ਗੁਇਰਜਿਸ ਨੇ ਇਨ੍ਹਾਂ ਸਾਰਿਆਂ ਦੇ ਨਾਂ ਵੀ ਇਸ ਮਾਮਲੇ ਵਿੱਚ ਲਿਖਵਾਏ ਸਨ।

ਅਪਰੈਲ ਦੇ ਮਹੀਨੇ ਕੈਨੇਡਾ ਵਿੱਚ ਰੋਜ਼ਗਾਰ ਦੇ 58,000 ਨਵੇਂ ਮੌਕੇ ਪੈਦਾ ਹੋਏ

editor — Sat, 12 May 2012 14:18:04 +0000

ਅਪਰੈਲ ਦੇ ਮਹੀਨੇ ਕੈਨੇਡਾ ਵਿੱਚ ਰੋਜ਼ਗਾਰ ਦੇ 58,000 ਨਵੇਂ ਮੌਕੇ ਪੈਦਾ ਹੋਏ। ਸਟੈਟੇਸਟਿਕਸ ਕੈਨੇਡਾ ਅਨੁਸਾਰ ਰੋਜ਼ਗਾਰ ਪੱਖੋਂ ਲਗਾਤਾਰ ਦੂਜੇ ਮਹੀਨੇ ਕੈਨੇਡਾ ਨੂੰ ਫਾਇਦਾ ਹੋਇਆ। ਪਿਛਲੇ ਤਿੰਨ ਦਹਾਕਿਆਂ ਵਿੱਚ ਰੋਜ਼ਗਾਰ ਦੇ ਲਿਹਾਜ ਨਾਲ ਕੈਨੇਡਾ ਲਈ ਇਹ ਦੋ ਮਹੀਨੇ ਕਾਫੀ ਵਧੀਆ ਰਹੇ। ਸਰਦੀਆਂ ਦੇ ਅੱਧ ਵਿੱਚ ਇਸ ਪਾਸੇ ਜਿਹੜੀ ਖੜੋਤ ਆਈ ਸੀ ਇਸ ਨਵੇਂ ਸੰਕੇਤ ਤੋਂ ਲੱਗਦਾ ਹੈ ਕਿ ਉਹ ਖੜੋਤ ਹੁਣ ਖ਼ਤਮ ਹੋ ਰਹੀ ਹੈ। ਕੈਨੇਡਾ ਦੇ ਸੱਤ ਪ੍ਰੋਵਿੰਸਾਂ ਵਿੱਚ ਫੁੱਲ ਟਾਈਮ ਤੇ ਚੰਗੀ ਤਨਖਾਹ ਵਾਲੀਆਂ ਨੌਕਰੀਆਂ ਹਾਸਲ ਕਰਨ ਵਿੱਚ ਕੈਨੇਡੀਅਨ ਕਾਮਯਾਬ ਰਹੇ। ਮਾਰਚ ਵਿੱਚ ਪੈਦਾ ਹੋਏ ਰੋਜ਼ਗਾਰ ਦੇ 82,300 ਮੌਕਿਆਂ ਤੋਂ ਇਲਾਵਾ ਅਪਰੈਲ ਦੇ ਮਹੀਨੇ ਦੇ ਅੰਕੜਿਆਂ ਨੂੰ ਜੇ ਜੋੜ ਕੇ ਵੇਖਿਆ ਜਾਵੇ ਤਾਂ ਇਨ੍ਹਾਂ ਦੋ ਮਹੀਨਿਆਂ ਵਿੱਚ ਰੋਜ਼ਗਾਰ ਦੇ ਕੁੱਲ 140,500 ਮੌਕੇ ਪੈਦਾ ਹੋਏ। 1981 ਤੋਂ ਲੈ ਕੇ ਹੁਣ ਤੱਕ ਇਹ ਰੋਜ਼ਗਾਰ ਪੱਖੋਂ ਦੇਸ਼ ਦੀ ਸੱਭ ਤੋਂ ਵਧੀਆ ਕਾਰਗੁਜ਼ਾਰੀ ਰਹੀ ਹੈ। ਦੂਜੇ ਪਾਸੇ ਸਿਆਸਤਦਾਨਾਂ ਤੇ ਅਰਥਸ਼ਾਸਤਰੀਆਂ ਨੇ ਰੋਜ਼ਗਾਰ ਦੇ ਖੇਤਰ ਵਿੱਚ ਆਈ ਤੇਜ਼ੀ ਦਾ ਸਵਾਗਤ ਕੀਤਾ।

ਕੰਜ਼ਰਵੇਟਿਵ ਤੇ ਐਨਡੀਪੀ ਦੇ ਸਮਰਥਨ ਵਿੱਚ 19-21 ਦਾ ਫਰਕ

editor — Sat, 12 May 2012 14:15:58 +0000

ਨਵੇਂ ਸਰਵੇਖਣ ਤੋਂ ਇਹ ਸਾਹਮਣੇ ਆਇਆ ਹੈ ਕਿ ਦੇਸ਼ ਭਰ ਵਿੱਚ ਐਨਡੀਪੀ ਦਾ ਅਧਾਰ ਹੋਰ ਮਜ਼ਬੂਤ ਹੋਇਆ ਹੈ। ਸਰਵੇਖਣ ਅਨੁਸਾਰ ਐਨਡੀਪੀ ਨੂੰ ਇਸ ਸਮੇਂ 34 ਫੀ ਸਦੀ ਸਮਰਥਨ ਹਾਸਲ ਹੋ ਰਿਹਾ ਹੈ ਜਦਕਿ ਕੰਜ਼ਰਵੇਟਿਵਾਂ ਨੂੰ 30 ਫੀ ਸਦੀ ਸਮਰਥਨ ਹੀ ਹਾਸਲ ਹੈ। ਇਸ ਮਾਮਲੇ ਵਿੱਚ ਗਲਤੀ ਹੋਣ ਦੀ ਗੁੰਜਾਇਸ਼ ਜੇ 2.2 ਫੀ ਸਦੀ ਅੰਕ ਮੰਨੀ ਜਾਵੇ ਤਾਂ ਦੋਵੇਂ ਪਾਰਟੀਆਂ 19-21 ਦੇ ਫਰਕ ਨਾਲ ਅੱਗੇ ਪਿੱਛੇ ਚੱਲ ਰਹੀਆਂ ਹਨ। ਇਹ ਵੀ ਪਤਾ ਲੱਗਿਆ ਹੈ ਕਿ ਐਨਡੀਪੀ ਕੰਜ਼ਰਵੇਟਿਵਾਂ ਦੇ ਰਵਾਇਤੀ ਇਲਾਕਿਆਂ ਵਿੱਚ ਵੀ ਆਪਣਾ ਅਧਾਰ ਮਜ਼ਬੂਤ ਕਰਨ ਵਿੱਚ ਸਫਲ ਰਹੀ ਹੈ। ਪੇਂਡੂ ਇਲਾਕਿਆਂ ਵਿੱਚ ਐਨਡੀਪੀ ਨੂੰ 31 ਫੀ ਸਦੀ ਸਮਰਥਨ ਹਾਸਲ ਹੋ ਰਿਹਾ ਹੈ ਜਦਕਿ ਟੋਰੀਜ਼ ਨੂੰ ਹਾਸਲ ਹੋਣ ਵਾਲਾ ਸਮਰਥਨ 35 ਫੀ ਸਦੀ ਹੈ। ਐਨਡੀਪੀ ਨੂੰ ਸ਼ਹਿਰੀ ਤੇ ਅਰਧਸ਼ਹਿਰੀ ਇਲਾਕਿਆਂ ਦੇ 36 ਫੀ ਸਦੀ ਲੋਕਾਂ ਦਾ ਸਾਥ ਮਿਲ ਰਿਹਾ ਹੈ। ਫਰਵਰੀ ਤੋਂ ਲੈ ਕੇ ਹੁਣ ਤੱਕ ਇਸ ਅੰਕੜੇ ਵਿੱਚ ਲਗਾਤਾਰ ਵਾਧਾ ਹੋਇਆ ਹੈ। ਇਸੇ ਦੌਰਾਨ ਇਨ੍ਹਾਂ ਇਲਾਕਿਆਂ ਵਿੱਚ ਹੀ ਕੰਜ਼ਰਵੇਟਿਵ 29 ਫੀ ਸਦੀ ਸਮਰਥਨ ਜੁਟਾਉਣ ਵਿੱਚ ਕਾਮਯਾਬ ਰਹੇ ਹਨ। ਜਦਕਿ ਚਾਰ ਮਹੀਨੇ ਪਹਿਲਾਂ ਤੱਕ ਕੰਜ਼ਰਵੇਟਿਵਾਂ ਨੂੰ ਇੱਥੋਂ ਮਿਲਣ ਵਾਲਾ ਸਮਰਥਨ 40 ਫੀ ਸਦੀ ਸੀ। ਸਰਵੇਖਣ ਅਨੁਸਾਰ ਲਿਬਰਲਾਂ ਨੂੰ ਮਿਲ ਰਿਹਾ ਸਮਰਥਨ 20 ਫੀ ਸਦੀ ਉੱਤੇ ਹੀ ਅਜੇ ਵੀ ਬਣਿਆ ਹੋਇਆ ਹੈ।

ਕੈਨੇਡਾ ਸਰਕਾਰ ਬੱਜਟ ਤਾਂ ਬਰਾਬਰ ਕਰ ਲਵੇਗੀ ਪਰ ਘੱਟ ਗਰੋਥ ਤੇ-ਕੈਵਿਨ

editor — Thu, 26 Apr 2012 10:03:06 +0000

ਸਟਾਰ ਖ਼ਬਰ-ਔਟਵਾ ਵੱਲੋਂ ਸਰਕਾਰੀ ਖ਼ਰਚਿਆਂ ਵਿੱਚ ਕਟੌਤੀ ਕਰਕੇ ਬੱਜਟ ਨੂੰ ਬਰਾਬਰ ਤਾਂ ਕਰ ਲਿਆ ਜਾਵੇਗਾ ਪਰ ਇਸ ਦੇ ਇਵਜ਼ ਵਜੋਂ ਗਰੋਥ ਦੀ ਗਤੀ ਹੌਲੀ ਰਹੇਗੀ ਅਤੇ ਇੱਕ ਲੱਖ ਨੌਕਰੀਆਂ ਖ਼ਤਮ ਹੋ ਜਾਣਗੀਆਂ। ਪਾਰਲੀਮੈਂਟਰੀ ਬੱਜਟ ਅਫਸਰ ਕੇਵਿਨ ਪੇਜ ਵੱਲੋਂ ਬੁੱਧਵਾਰ ਨੂੰ ਜਾਰੀ ਰਿਪੋਰਟ ਨੇ ਬਹੁਤਿਆਂ ਨੇ ਹੈਰਾਨੀ ਵਿੱਚ ਪਾਇਆ ਹੈ ਕਿ ਕਿਵੇਂ ਪੇਜ ਹਾਰਪਰ ਸਰਕਾਰ ਨਾਲ਼ ਸਹਿਮਤ ਹੋ ਗਏ ਹਨ ਕਿ ਸਰਕਾਰ ਆਪਣਾ ਬੱਜਟ ਬਰਾਬਰ ਕਰ ਲਵੇਗੀ। ਏਹੀ ਨਹੀਂ ਪੇਜ ਦਾ ਇਹ ਵੀ ਕਹਿਣਾ ਹੈ ਕਿ ਸਰਕਾਰ ਆਪਣੇ ਅਨੁਮਾਨ 2017-18 ਤੋਂ ਇੱਕ ਸਾਲ ਪਹਿਲਾਂ 2015-16 ਵਿੱਚ ਹੀ ਬੱਜਟ ਨੂੰ ਬਰਾਬਰ ਕਰ ਸਕਦੀ ਹੈ।
ਬੱਜਟ ਅਫਸਰ ਦਾ ਕਹਿਣਾ ਹੈ ਕਿ ਬੱਜਟ ਨੂੰ ਬਰਾਬਰ ਕਰਨ ਲਈ ਭਾਰੀ ਕੀਮਤ ਚੁਕਾਉਣੀ ਪਵੇਗੀ। ਸਰਕਾਰ ਆਰਥਿਕਤਾ ਚੋਂ 52 ਬਿਲੀਅਨ ਡਾਲਰ ਬਾਹਰ ਕੱਢ ਲਵੇਗੀ ਅਤੇ ਸੂਬਿਆਂ ਤੇ 9 ਬਿਲੀਅਨ ਡਾਲਰ ਦਾ ਵਾਧੂ ਬੋਝ ਵਧ ਜਾਵੇਗਾ।
ਪੇਜ ਨੇ ਭਵਿੱਖਬਾਣੀ ਕੀਤੀ ਹੈ ਕਿ ਸਰਕਾਰ ਵੱਲੋਂ ਖਰਚਿਆਂ ਵਿੱਚ ਕਟੌਤੀ ਨਾਲ਼ ਆਰਥਿਕਤਾ ਦੀ ਮਜਬੂਤੀ ਵਿੱਚ ਬੱਜ ਪਵੇਗਾ, ਨੌਕਰੀਆਂ ਖ਼ਤਮ ਹੋਣਗੀਆਂ ਅਤੇ ਗਰੋਥ ਦੀ ਗਤੀ ਹੌਲੀ ਹੋ ਜਾਵੇਗੀ। ਪੇਜ ਨੇ ਆਪਣੀ ਇਹ ਰਿਪੋਰਟ ਪੀ.ਬੀ.ਓ ਦੀ ਵੈੱਬਸਾਈਟ ਤੇ ਪਾਈ ਹੈ। ਉਹ ਅੱਜ ਵੀਰਵਾਰ ਨੂੰ ਕੌਮਨਜ਼ ਕਮੇਟੀ ਅੱਗੇ ਪੇਸ਼ ਹੋ ਰਹੇ ਹਨ।
ਔਟਵਾ ਦੀ ਚੱਲ ਰਹੀ ਯੋਜਨਾ ਅਤੇ ਸਰਕਾਰੀ ਵਿਭਾਗਾਂ ਵਿੱਚ 6.9 ਫੀਸਦੀ ਖਰਚੇ ਘੱਟ ਕਰਨ ਨਾਲ਼ ਆਰਥਿਕਤਾ ਵਿੱਚ ਸਾਲ 2010-11 ਵਿੱਚ ਇਸ ਦੀ ਭਾਈਵਾਲੀ 7.3 ਫੀਸਦੀ ਤੋਂ ਘਟ ਕੇ 2016-17 ਤੱਕ 5.5 ਫੀਸਦੀ ਰਹਿ ਜਾਵੇਗੀ। ਪੇਜ ਨੇ ਆਪਣੀ ਰਿਪੋਰਟ ਵਿੱਚ ਕਿਹਾ ਹੈ ਕਿ ਸਰਕਾਰ ਦੇ ਇਹ ਕਦਮ ਆਰਥਿਕਤਾ ਤੇ ਡੂੰਘਾ ਅਸਰ ਪਾਉਣਗੇ।
ਪੇਜ ਨੇ ਕਿਹਾ ਕਿ ਇਹਨਾਂ ਯੋਜਨਾਵਾਂ ਨਾਲ਼ ਆਰਥਿਕ ਗਰੋਥ ਵਿੱਚ ਇਸ ਸਾਲ 0.3 ਫੀਸਦੀ ਅਤੇ ਸੰਨ 2014 ਵਿੱਚ 0.88 ਫੀਸਦੀ ਦੀ ਕਮੀ ਆ ਸਕਦੀ ਹੈ। ਸੰਨ 2013 ਵਿੱਚ ਕੈਨੇਡਾ ਦੀ ਗਰੋਥ 1.6 ਫੀਸਦੀ ਦੀ ਦਰ ਤੇ ਰਹੇਗੀ ਜੋ ਬੈਂਕ ਆਫ ਕੈਨੇਡਾ ਅਤੇ ਹੋਰ ਨਿੱਜੀ ਸੰਸਥਾਵਾਂ ਦੇ ਅਨੁਮਾਨ ਤੋਂ ਘੱਟ ਹੋਵੇਗੀ।
ਨੌਕਰੀਆਂ ਵੱਲ ਜਾਂਦਿਆਂ ਪੇਜ ਨੇ ਕਿਹਾ ਕਿ ਸਰਕਾਰ ਦੀ ਯੋਜਨਾ ਦਾ ਅਸਰ ਨੌਕਰੀਆਂ ਤੇ ਵੀ ਬਰਾਬਰ ਹੋਵੇਗਾ। ਇਸ ਯੋਜਨਾ ਨਾਲ਼ ਇਸ ਸਾਲ 18000 ਨੌਕਰੀਆਂ ਘੱਟ ਪੈਦਾ ਹੋਣਗੀਆਂ। ਰਿਪੋਰਟ ਵਿੱਚ ਇਹ ਵੀ ਭਵਿੱਖਬਾਣੀ ਕੀਤੀ ਗਈ ਹੈ ਬੇਰੁਜ਼ਗਾਰੀ ਦਰ ਜੋ ਹੁਣ 7.2 ਫੀਸਦੀ ਉਹ ਸੰਨ 2013 ਵਿੱਚ ਵਧ ਕੇ 7.9 ਫੀਸਦੀ ਹੋ ਜਾਵੇਗੀ।
ਜਿ਼ਕਰਯੋਗ ਹੈ ਕਿ ਹੁਣ ਤੱਕ ਪਾਰਲੀਮੈਂਟਰੀ ਬੱਜਟ ਅਫਸਰ ਕੇਵਿਨ ਪੇਜ ਹਾਰਪਰ ਸਰਕਾਰ ਨਾਲ਼ ਹਮੇਸ਼ਾਂ 36 ਦੇ ਅੰਕੜੇ ਤੇ ਰਹੇ ਹਨ। ਹਾਰਪਰ ਸਰਕਾਰ ਨੇ ਜੋ ਵੀ ਆਰਥਿਕ ਫੈਸਲੇ ਕੀਤੇ ਉਹਨਾਂ ਦੀ ਪੇਜ ਨੇ ਹਮੇਸ਼ਾਂ ਵਿਰੋਧਤਾ ਹੀ ਕੀਤੀ ਹੈ। ਇਹ ਪਹਿਲੀ ਵਾਰ ਹੈ ਜਦੋਂ ਪੇਜ ਸਹਿਮਤ ਹੋ ਕੇ ਵੀ ਅਸਹਿਮਤ ਹਨ। ਇੱਕ ਪਾਸੇ ਉਹ ਸਰਕਾਰ ਵੱਲੋਂ ਬੱਜਟ ਬਰਾਬਰ ਕਰ ਲੈਣ ਨਾਲ਼ ਸਹਿਮਤ ਹਨ ਪਰ ਨਾਲ਼ ਹੀ ਉਹ ਸਰਕਾਰ ਵੱਲੋਂ ਬੱਜਟ ਨੂੰ ਬਰਾਬਰ ਕਰਨ ਲਈ ਪੁੱਟੇ ਜਾ ਰਹੇ ਕਦਮਾਂ ਨੂੰ ਗ਼ਲਤ ਦੱਸ ਰਹੇ ਹਨ ਅਤੇ ਆਰਥਿਕਤਾ ਲਈ ਹਾਨੀਕਾਰਕ ਦੱਸ ਰਹੇ ਹਨ।

ਅਦਾਲਤੀ ਹੁਕਮਾਂ ਤੋਂ ਬਾਅਦ- ਪਤਨੀ ਨੂੰ ਮਾਰ ਕੇ ਬੀਮਾ ਲੈਣ ਵਾਲੇ ਦਾ ਸਰਕਾਰ ਨੇ ਬੀਮਾ ਰੋਕਿਆ

editor — Thu, 26 Apr 2012 10:01:00 +0000

ਸਟਾਰ ਖ਼ਬਰ-ਉਨਟਾਰੀਓ ਸਰਕਾਰ ਦਾ ਕਹਿਣਾ ਹੈ ਕਿ ਉਹ ਉਸ ਵਿਅਕਤੀ ਨੂੰ ਬੀਮੇ ਦੀ ਰਕਮ ਨਹੀਂ ਦੇਵੇਗੀ ਜਿਸ ਨੂੰ ਕੱਲ੍ਹ ਅਦਾਲਤ ਨੇ ਬੀਮੇ ਦੀ ਰਕਮ ਦੇਣ ਦਾ ਹੁਕਮ ਸੁਣਾਇਆ ਸੀ। ਮੰਗਲਵਾਰ ਨੂੰ ਉਨਟਾਰੀਓ ਦੀ ਅਦਾਲਤ ਨੇ ਉਸ ਵਿਅਕਤੀ ਨੂੰ 51000 ਡਾਲਰ ਬੀਮੇ ਦੀ ਰਕਮ ਦੇਣ ਲਈ ਬੀਮਾ ਕੰਪਨੀ ਨੂੰ ਹੁਕਮ ਸੁਣਾਇਆ ਸੀ ਜਿਸ ਦਾ ਚਾਰੇ ਪਾਸਿਓਂ ਵਿਰੋਧ ਹੋ ਰਿਹਾ ਸੀ। ਅਦਾਲਤ ਦਾ ਕਹਿਣਾ ਹੈ ਕਿ ਜਦੋਂ ਉਕਤ ਵਿਅਕਤੀ ਨੇ ਆਪਣੀ ਪਤਨੀ ਨੂੰ ਮਾਰਿਆ ਸੀ ਤਾਂ ਉਸ ਵਕਤ ਉਹ ਪਾਗਲ ਸੀ ਅਤੇ ਉਸ ਨੂੰ ਇਹ ਨਹੀਂ ਸੀ ਪਤਾ ਕਿ ਉਹ ਕੀ ਕਰ ਰਿਹਾ ਹੈ। ਪਰ ਨਾਲ਼ ਹੀ ਬੀਮਾ ਕੰਪਨੀ ਨੂੰ ਹੁਕਮ ਦਿੱਤਾ ਸੀ ਕਿ ਉਕਤ ਵਿਅਕਤੀ ਨੂੰ ਬੀਮੇ ਦੀ ਰਕਮ ਦੇਣੀ ਬਣਦੀ ਹੈ। ਅਦਾਲਤ ਨੇ ਆਪਣੇ ਹੁਕਮ ਵਿੱਚ ਇਹ ਵੀ ਕਿਹਾ ਸੀ ਕਿ ਉਕਤ ਵਿਅਕਤੀ ਮੁਜਰਮਾਨਾਂ ਕਾਰਵਾਈ ਹੇਠ ਦੋਸ਼ੀ ਨਹੀਂ ਹੈ।
ਇਸ ਹੁਕਮ ਦੇ ਨਾਲ਼ ਹੀ ਅਦਾਲਤ ਨੇ ਸਰਕਾਰ ਨੂੰ 30 ਦਿਨ ਦਾ ਸਮਾਂ ਦਿੱਤਾ ਸੀ ਕਿ ਅਗਰ ਸਰਕਾਰ ਉਕਤ ਵਿਅਕਤੀ ਦੀ ਕਾਰਵਾਈ ਦੇ ਉਲਟ ਬਣਦੀ ਰਕਮ ਨੂੰ ਜ਼ਬਤ ਕਰਨ ਦੀ ਅਰਜ਼ੀ ਦੇਣਾ ਚਾਹੁੰਦੀ ਹੈ।
ਉਨਟਾਰੀਓ ਦੀ ਅਟੌਰਨੀ ਜਨਰਲ ਦੀ ਬੁਲਾਰੀ ਅਲੇਨ ਫਲਿੱਸ ਨੇ ਦੱਸਿਆ ਕਿ ਸਰਕਾਰ ਸਿਵਲ ਰੈਮਡੀ ਐਪਲੀਕੇਸ਼ਨ ਪਾਉਣ ਜਾ ਰਹੀ ਹੈ। ਅਟੌਰਨੀ ਜਨਰਲ ਕੋਲ ਸਿਵਲ ਰੈਮੇਡੀਜ਼ ਐਕਟ ਦੇ ਅਧੀਨ ਇਹ ਅਧਿਕਾਰ ਹੈ ਕਿ ਉਹ ਅਦਾਲਤ ਨੂੰ ਸਰਕਾਰ ਵੱਲੋਂ ਜ਼ਬਤ ਦੀ ਕਾਰਵਾਈ ਲਈ ਅਪੀਲ ਕਰ ਸਕੇ।
ਕਾਨੂੰਨ ਵਿੱਚ ਸਾਫ ਤੌਰ ਤੇ ਇਹ ਨਹੀਂ ਲਿਖਿਆ ਹੋਇਆ ਕਿ ਇੱਕ ਪਾਗਲ ਵਿਅਕਤੀ ਨੂੰ ਮੁਜਰਿਮ ਕਰਾਰ ਨਾਂ ਦਿੱਤਾ ਜਾ ਸਕੇ। ਜ਼ਬਤ ਕੀਤੀ ਗਈ ਰਕਮ ਲਈ ਅਟੌਰਨੀ ਜਨਰਲ ਨੂੰ ਅਦਾਲਤ ਨੂੰ ਇਹ ਸਿੱਧ ਕਰਨਾ ਹੋਵੇਗਾ ਕਿ ਅਜਿਹਾ ਕਰਨਾ ਇਨਸਾਫ ਦੇ ਹਿੱਤ ਵਿੱਚ ਹੈ। ਇਸ ਦੇ ਬਾਵਜੂਦ ਵੀ ਅਦਾਲਤ ਸਰਕਾਰ ਦੀ ਇਸ ਅਪੀਲ ਨੂੰ ਖਾਰਜ ਕਰ ਸਕਦੀ ਹੈ।
ਜੂਨ 2006 ਵਿੱਚ ਵੇਦ ਪ੍ਰਕਾਸ਼ ਢੀਂਗਰਾ ਨੇ ਆਪਣੇ ਰਿੱਚਮੰਡ ਹਿੱਲ ਘਰ ਵਿੱਚ ਆਪਣੀ ਪਤਨੀ ਕਮਲੇਸ਼ ਕੁਮਾਰੀ ਢੀਂਗਰਾ ਦੇ ਇੱਕ ਪੱਥਰ ਨਾਲ਼ ਬਹੁਤ ਵਾਰ ਸਿਰ ਤੇ ਮਾਰਿਆ ਸੀ ਅਤੇ ਫਿਰ ਉਸ ਦੇ ਸਰੀਰ ਅਤੇ ਗਰਦਨ ਤੇ 24 ਵਾਰ ਜ਼ਖ਼ਮ ਕਰਕੇ ਮਾਰ ਦਿੱਤਾ ਸੀ। ਉਸ ਨੂੰ ਸੈਕਿੰਡ ਡਿਗਰੀ ਮਰਡਰ ਅਧੀਨ ਚਾਰਜ ਕਰਨ ਦੀ ਕੋਸਿ਼ਸ਼ ਕੀਤੀ ਗਈ ਸੀ ਪਰ ਸੰਨ 2008 ਵਿੱਚ ਉਸ ਨੂੰ ਪਾਗਲ ਕਰਾਰ ਦੇ ਕੇ ਕੋਈ ਮੁਜਰਮਾਨਾ ਚਾਰਜ ਨਹੀਂ ਸਨ ਲਾਏ ਗਏ।
ਉਸ ਤੋਂ ਬਾਅਦ ਉਸ ਨੂੰ ਸ਼ਰਤਾਂ ਤਹਿਤ ਰਿਹਾਅ ਕਰ ਦਿੱਤਾ ਗਿਆ।
ਦੂਜੇ ਪਾਸੇ ਕੌਮਨ ਲਾਅ ਅਧੀਨ ਉਹ ਵਿਅਕਤੀ ਨਕਦੀ ਦਾ ਹੱਕਦਾਰ ਨਹੀਂ ਹੋਵੇਗਾ ਜੋ ਆਪ ਹੀ ਮੁਜਰਿਮ ਹੋਵੇਗਾ। ਇਸ ਕੇਸ ਵਿੱਚ ਅਦਾਲਤ ਨੇ ਕੋਈ ਮੁਜਰਿਮਾਨਾਂ ਚਾਰਜ ਨਹੀਂ ਲਾਇਆ ਅਤੇ ਇਸੇ ਅਧੀਨ ਹੀ ਢੀਂਗਰਾ ਨੂੰ ਬੀਮਾ ਰਾਸ਼ੀ ਦੇਣ ਦਾ ਹੁਕਮ ਸੁਣਾਇਆ ਹੈ।
ਇਸ ਅਦਾਲਤੀ ਹੁਕਮਾਂ ਤੋਂ ਬਾਅਦ ਬਹੁਤ ਸਾਰੇ ਲੋਕਾਂ ਨੇ ਔਨਲਾਈਨ ਆਪਣੇ ਵਿਚਾਰਾਂ ਰਾਹੀਂ ਇਹਨਾਂ ਹੁਕਮਾਂ ਨੂੰ ਗ਼ਲਤ ਕਰਾਰ ਦਿੱਤਾ ਹੈ ਅਤੇ ਕਿਹਾ ਕਿ ਇਹ ਨਿਰਦੋਸ਼ਾਂ ਦੇ ਮੂੰਹ ਤੇ ਚਪੇੜ ਹੈ।

ਸਾਡੇ ਕੋਲ਼ ਅਮੈਰਿਕਾ ਨੂੰ ਹਰਾਉਣ ਵਾਲੇ ਹਥਿਆਰ ਮੌਜੂਦ-ਨੌਰਥ ਕੋਰੀਆ

editor — Thu, 26 Apr 2012 10:00:32 +0000

ਸਟਾਰ ਖ਼ਬਰ-ਨੌਰਥ ਕੋਰੀਆ ਦੇ ਇੱਕ ਉੱਚ ਮਿਲਟਰੀ ਅਧਿਕਾਰੀ ਦਾ ਕਹਿਣਾ ਹੈ ਕਿ ਸਾਡੇ ਕੋਲ਼ ਅਮੈਰਿਕਾ ਨੂੰ ਹਰਾਉਣ ਵਾਲੇ ਨਵੀਨਤਮ ਹਥਿਆਰ ਮੌਜੂਦ ਹਨ। ਹੁਣ ਤੱਕ ਮਾਹਿਰਾਂ ਵੱਲੋਂ ਇਸ ਦਾਅਵੇ ਤੇ ਸ਼ੱਕ ਪ੍ਰਗਟਾਇਆ ਜਾਂਦਾ ਰਿਹਾ ਹੈ ਪਰ ਬੁੱਧਵਾਰ ਨੂੰ ਇਸ ਅਧਿਕਾਰੀ ਨੇ ਯੌਂਗਯੈਂਗ ਵਿੱਚ ਅਜਿਹਾ ਦਾਅਵਾ ਕੀਤਾ ਹੈ।
ਇਹ ਬਿਆਨ ਵਾਈਸ ਮਾਰਸ਼ਲ ਰੀ ਯੌਂਗ ਹੋ ਵੱਲੋਂ ਆਰਮੀ ਦੀ ਹੋਂਦ ਦੀ 80ਵੀਂ ਵਰ੍ਹੇਗੰਢ ਮੰਨਾਉਣ ਮੌਕੇ ਦਿੱਤਾ ਹੈ। ਬਾਕੀ ਦੁਨੀਆਂ ਵੱਲੋਂ ਮੁਲਕ ਦੀ ਫੌਜੀ ਅਤੇ ਹਥਿਆਰੀ ਸ਼ਕਤੀਆਂ ਦੇ ਵੱਖ-ਵੱਖ ਅੰਦਾਜ਼ੇ ਲਗਾਏ ਜਾ ਰਹੇ ਹਨ। ਵਸਿ਼ੰਗਟਨ ਨੂੰ ਇਸ ਗੱਲ ਦਾ ਫਿਕਰ ਹੈ ਕਿ ਕੋਰੀਆ ਬਲਿਸਟਿਕ ਮਿਜ਼ਾਈਲ ਅਤੇ ਪ੍ਰਮਾਣੂ ਬੰਬ ਬਣਾ ਕੇ ਵਰਤ ਸਕਦਾ ਹੈ। ਪਰੰਤੂ ਬਾਹਰੀ ਮਾਹਿਰਾਂ ਦਾ ਕਹਿਣਾ ਹੈ ਕਿ ਅਜਿਹਾ ਹੋਣ ਲਈ ਹਾਲੇ ਲੰਬਾ ਸਮਾਂ ਲੱਗੇਗਾ। ਮਾਹਿਰਾਂ ਦੀ ਰਾਇ ਹੈ ਕਿ ਕੋਰੀਆ ਕੋਲ਼ ਬੰਬ ਬਣਾਉਣ ਵਾਲਾ ਸਮਾਨ ਤਾਂ ਹੈ ਪਰ ਛੋਟੇ ਬੰਬ ਬਣਾਉਣ ਦੇ ਸਮਰੱਥ ਨਹੀਂ ਹੈ ਜੋ ਮਿਜ਼ਾਈਲ ਵਿੱਚ ਲੋਡ ਕੀਤੇ ਜਾ ਸਕਣ। ਮੁਲਕ ਵੱਲੋਂ ਇਸ ਤੋਂ ਪਹਿਲਾਂ 1998, 2006, 2009 ਤੇ ਹੁਣ ਪਿਛਲੇ ਮਹੀਨੇ ਕੀਤੇ ਗਏ ਪ੍ਰੀਖਣ ਫੇਲ੍ਹ ਹੀ ਰਹੇ ਹਨ।
ਰੀ ਨੇ ਇਸ ਮੌਕੇ ਸਾਊਥ ਕੋਰੀਆ ਅਤੇ ਅਮੈਰਿਕਾ ਵੱਲੋਂ ਕੀਤੇ ਜਾਣ ਵਾਲੇ ਸੰਭਾਵੀ ਹਮਲੇ ਦੇ ਮੁਕਾਬਲੇ ਲਈ ਮੁਲਕ ਦੀ ਫੌਜ ਨੂੰ ਮਜਬੂਤ ਕਰਨ ਦੀ ਲੋੜ ਤੇ ਜ਼ੋਰ ਦਿੱਤਾ। ਉਹਨਾਂ ਨੇ ਇਸ ਮੌਕੇ ਕਿਹਾ ਕਿ ਸਾਡਾ ਮੁਲਕ ਇੱਕ ਪ੍ਰਮਾਣੂ ਅਤੇ ਫੌਜੀ ਸ਼ਕਤੀ ਹੈ ਅਤੇ ਉਹਨਾਂ ਨੇ ਮੁਲਕ ਦੇ ਨਵੇਂ ਨੇਤਾ ਕਿੱਮ ਯੌਂਗ ਅਨ ਦੀ ਵੀ ਸਰਾਹਨਾ ਕੀਤੀ ਜੋ ਮਿਲਟਰੀ ਨੂੰ ਇਸ ਮੰਤਵ ਲਈ ਪੂਰਾ ਸਹਿਯੋਗ ਦੇ ਰਹੇ ਹਨ।
ਇਸ ਮੌਕੇ ਇਸ ਮਿਲਟਰੀ ਨੇਤਾ ਨੇ ਫੌਜੀ ਅਧਿਕਾਰੀਆਂ ਨੂੰ ਕਿਹਾ ਕਿ ਸਾਡੇ ਕੋਲ਼ ਅਜਿਹੀ ਸ਼ਕਤੀ ਮੌਜੂਦ ਹੈ ਜੋ ਇੱਕ ਹੀ ਝਟਕੇ ਵਿੱਚ ਅਮੈਰਿਕਾ ਨੂੰ ਹਰਾ ਸਕਦੀ ਹੈ। ਇਸ ਤੋਂ ਪਹਿਲਾਂ ਵੀ ਮਿਲਟਰੀ ਨੇਤਾ ਅਜਿਹੀਆਂ ਹੀ ਤਕਰੀਰਾਂ ਕਰਦੇ ਆਏ ਹਨ।
ਰੀ ਨੇ ਹਥਿਆਰਾਂ ਬਾਰੇ ਵਿਸਥਾਰ ਵਿੱਚ ਕੋਈ ਜਾਣਕਾਰੀ ਨਹੀਂ ਦਿੱਤੀ। ਇਸ ਮੌਕੇ ਉਹਨਾਂ ਨੇ ਸਿਰਫ ਦੁਸ਼ਮਣ ਮੁਲਕਾਂ ਨੂੰ ਧਮਕਾਉਣ ਵਾਲੇ ਬਿਆਨ ਹੀ ਦਿੱਤੇ ਹਨ।

ਪੈਂਟਾਗਨ ਦੀ ਅਪੀਲ ਤੋਂ ਬਾਅਦ- ਅਫਗਾਨਿਸਤਾਨ ਵਿੱਚ ਟਰੇਨਿੰਟ ਮਿਸ਼ਨ ਵਧਾਇਆ ਨਹੀਂ ਜਾਣਾ ਚਾਹੀਦਾ-ਮੁਲਕੇਅਰ

editor — Thu, 26 Apr 2012 10:00:15 +0000

ਸਟਾਰ ਖ਼ਬਰ-ਵਿਰੋਧੀ ਪਾਰਟੀ ਦੇ ਨੇਤਾ ਟੌਮ ਮੁਲਕੇਅਰ ਦਾ ਕਹਿਣਾ ਹੈ ਕਿ ਅਫਗਾਨਿਸਤਾਨ ਵਿੱਚ ਕੈਨੇਡੀਅਨ ਮਿਸ਼ਨ ਨੂੰ ਹੋਰ ਨਹੀਂ ਵਧਾਇਆ ਜਾਣਾ ਚਾਹੀਦਾ। ਨਿਊ ਡੈਮੋਕਰੈਟ ਪਾਰਟੀ ਨੇਤਾ ਮੁਲਕੇਅਰ ਉਹਨਾਂ ਰਿਪੋਰਟਾਂ ਤੋਂ ਬਾਅਦ ਆਪਣਾ ਨਜ਼ਰੀਆ ਪੇਸ਼ ਕਰ ਰਹੇ ਸਨ ਜਿਸ ਵਿੱਚ ਕਿਹਾ ਗਿਆ ਹੈ ਕਿ ਪੈਂਟਾਗਨ ਨੇ ਹਾਰਪਰ ਸਰਕਾਰ ਨੂੰ ਕਿਹਾ ਹੈ ਕਿ ਸੰਨ 2014 ਵਿੱਚ ਜਦੋਂ ਅਫਗਾਨਿਸਤਾਨ ਵਿੱਚ ਨਾਟੋ ਮਿਸ਼ਨ ਖ਼ਤਮ ਹੋਣਾ ਤੋਂ ਬਾਅਦ ਵੀ ਕੈਨੇਡਾ ਦੇ ਟਰੇਨਿੰਗ ਸਟਾਫ ਨੂੰ ਓਥੇ ਰੱਖਿਆ ਜਾਵੇ।
ਇਸ ਨੀਤੀ ਪਿੱਛੇ ਅਫਗਾਨਿਸਤਾਨ ਦੇ ਕਮਾਂਡੋ ਨੂੰ ਟਰੇਨਿੰਗ ਦੇਣਾ ਜਾਰੀ ਰੱਖਣਾ ਹੈ ਤਾਂ ਕਿ ਤਾਲਿਬਾਨਾਂ ਨਾਲ਼ ਲੜਾਈ ਜਾਰੀ ਰੱਖੀ ਜਾ ਸਕੇ।
ਪਿਛਲੀ ਗਰਮ ਰੁੱਤ ਵਿੱਚ ਅਜਿਹਾ ਮੋਸ਼ਨ ਕੈਨੇਡਾ ਦੀ ਪਾਰਲੀਮੈਂਟ ਵਿੱਚ ਰੱਖਿਆ ਗਿਆ ਸੀ ਜਿਸ ਵਿੱਚ ਇਹ ਸਹਿਮਤੀ ਹੋਈ ਸੀ ਕਿ ਕੈਨੇਡਾ ਦਾ ਮਿਸ਼ਨ ਅਫਗਾਨਿਸਤਾਨ ਵਿੱਚ ਮਿਥੇ ਸਮੇਂ ਤੇ ਖ਼ਤਮ ਕਰ ਦਿੱਤਾ ਜਾਵੇ ਅਤੇ ਇਸ ਵਿੱਚ ਸਪੈਸ਼ਲ ਟਰੇਨਿੰਗ ਦੇਣ ਵਾਲੀਆਂ ਫੋਰਸਾਂ ਨੂੰ ਵਾਪਿਸ ਬੁਲਾਉਣਾ ਵੀ ਸ਼ਾਮਿਲ ਸੀ। ਕੈਨੇਡੀਅਨ ਫੌਜਾਂ 2001 ਤੋਂ ਲਗਾਤਾਰ ਓਥੇ ਲੜ ਰਹੀਆਂ ਹਨ।
ਆਮ ਫੌਜਾਂ ਨੂੰ ਵਾਪਿਸ ਬੁਲਾ ਲਏ ਜਾਣ ਤੋਂ ਬਾਅਦ 950 ਸਪੈਸ਼ਲ ਟਰੇਨੀ ਓਥੇ ਤਾਇਨਾਤ ਹਨ ਅਤੇ ਅਫਗਾਨੀ ਫੋਰਸਾਂ ਨੂੰ ਟਰੇਨਿੰਗ ਦੇਣ ਦਾ ਕੰਮ ਸੰਭਾਲ ਰਹੇ ਹਨ। ਉਹਨਾਂ ਦਾ ਮਿਸ਼ਨ ਸੰਨ 2014 ਦੀ ਬਹਾਰ ਰੁੱਤ ਤੱਕ ਮਿਥਿਆ ਗਿਆ ਹੈ ਜਿਸ ਨੂੰ ਪੈਂਟਾਗਨ ਨੇ ਵਧਾਉਣ ਲਈ ਕਿਹਾ ਹੈ।
ਮੁਲਕੇਅਰ ਦਾ ਕਹਿਣਾ ਹੈ ਕਿ ਪਾਰਲੀਮੈਂਟ ਬੋਲ ਚੁੱਕੀ ਹੈ ਅਤੇ ਮੁਲਕ ਦਾ ਰੋਲ ਖ਼ਤਮ ਹੋ ਗਿਆ ਹੈ। ਮੁਲਕੇਅਰ ਦਾ ਕਹਿਣਾ ਹੈ ਕਿ ਅਮੈਰਿਕਾ ਤੋਂ ਅਜਿਹੀ ਮੰਗ ਨੂੰ ਸੁਣ ਕੇ ਵੀ ਅੱਗ ਨਾਲ਼ ਖੇਡ ਰਹੇ ਹਨ।

ਅਲਬਰਟਾ ਚੋਣਾਂ- ਵਾਈਲਡਰੋਜ਼ ਪਾਰਟੀ ਆਪਣੀਆਂ ਨੀਤੀਆਂ ਤੇ ਦੁਬਾਰਾ ਗ਼ੌਰ ਕਰੇਗੀ-ਡੈਨੀਅਲ ਸਮਿੱਥ- ਸਰਵੇਖਣਾਂ ਦੀ ਫਿਰ ਨਿੱਕਲੀ ਫੂਕ

editor — Thu, 26 Apr 2012 09:59:55 +0000

ਸਟਾਰ ਖ਼ਬਰ-ਅਲਬਰਟਾ ਵਿੱਚ ਪੀ.ਸੀ ਪਾਰਟੀ ਨੇ ਆਪਣੀ ਜਿੱਤ ਨੂੰ ਬਰਕਰਾਰ ਰੱਖਦਿਆਂ ਲਗਾਤਾਰ 12ਵੀਂ ਵਾਰ ਬਹੁਮਤ ਵਾਲੀ ਸਰਕਾਰ ਬਣਾ ਲਈ ਹੈ। ਲੰਘੇ ਸੋਮਵਾਰ ਨੂੰ ਸਾਰੇ ਸਰਵੇਖਣਾਂ ਅਤੇ ਸਿਆਸੀ ਪੰਡਿਤਾਂ ਨੂੰ ਅਚੰਭੇ ਵਿੱਚ ਪਾਉਂਦਿਆਂ ਟੋਰੀ ਪਾਰਟੀ ਨੇ ਆਪਣੀ ਨੇਤਾ ਅਲਬਰਟਾ ਦੀ ਪ੍ਰੀਮੀਅਰ ਐਲੀਸਨ ਰੈੱਡਫੋਰਡ ਦੀ ਅਗਵਾਈ ਵਿੱਚ ਕੁੱਲ87 ਵਿੱਚੋਂ 61 ਸੀਟਾਂ ਜਿੱਤ ਕੇ ਵੱਡੀ ਬਹੁਮਤ ਹਾਸਲ ਕੀਤੀ ਹੈ।
ਨਵੀਂ ਪਾਰਟੀ ਵਜੋਂ ਉੱਭਰ ਕੇ ਸਾਹਮਣੇ ਆਈ ਵਾਈਲਡਰੋਜ਼ ਪਾਰਟੀ ਜਿਸ ਨੂੰ ਵੋਟਾਂ ਪੈਣ ਵਾਲੇ ਦਿਨ ਤੱਕ ਜਿੱਤਦੇ ਵਿਖਾਇਆ ਗਿਆ ਸੀ ਨੂੰ ਸਿਰਫ 17 ਸੀਟਾਂ ਹੀ ਨਸੀਬ ਹੋਈਆਂ। ਵਾਈਲਡਰੋਜ਼ ਪਾਰਟੀ ਦੀ ਨੇਤਾ ਡੈਨੀਅਲ ਸਮਿੱਥ ਨੂੰ ਵੀ ਆਸ ਸੀ ਕਿ ਉਹ ਆਪਣੀ ਸਰਕਾਰ ਜ਼ਰੂਰ ਬਣਾ ਲੈਣਗੇ ਅਤੇ ਟੋਰੀਆਂ ਦੇ 41 ਸਾਲਾ ਪੁਰਾਣੇ ਕਿਲੇ ਨੂੰ ਢਾਹ ਦੇਣਗੇ। ਪਰ ਵਾਲੀਡਰੋਜ਼ ਪਾਰਟੀ ਨਵੀਂ ਹੋਣ ਕਰਕੇ ਅਲਬਰਟਾ ਦੇ ਵੋਟਰਾਂ ਨੇ ਜਿ਼ਆਦਾ ਯਕੀਨ ਨਹੀਂ ਕੀਤਾ।
ਇਸ ਤੋਂ ਇਲਾਵਾ ਲਿਬਰਲ ਪਾਰਟੀ ਨੂੰ ਮਹਿਜ਼ 5 ਸੀਟਾਂ ਹੀ ਮਿਲੀਆਂ ਹਨ। ਲਿਬਰਲ ਦੇ ਨੇਤਾ ਡਾ: ਰਾਜ ਸ਼ਰਮਨ ਨੇ ਤਾਂ ਕੁਝ ਦਿਨ ਪਹਿਲਾਂ ਹੀ ਆਪਣੀ ਹਾਰ ਨੂੰ ਕਬੂਲ ਕਰ ਲਿਆ ਸੀ ਅਤੇ ਘੱਟ ਗਿਣਤੀ ਸਰਕਾਰ ਬਣਨ ਦੀ ਸੂਰਤ ਵਿੱਚ ਆਪਣੀ ਪਾਰਟੀ ਦੇ ਸਮਰਥਨ ਬਦਲੇ ਸਿਹਤ ਮੰਤਰੀ ਦਾ ਅਹੁਦਾ ਮੰਗਣਾ ਸ਼ੁਰੂ ਕਰ ਦਿੱਤਾ ਸੀ। ਫਿੱਲਹਾਲ ਉਹ ਆਪਣੀ ਸੀਟ ਜਿੱਤ ਗਏ ਹਨ।
ਹਾਰ ਤੋਂ ਬਾਅਦ ਵਾਈਲਡਰੋਜ਼ ਪਾਰਟੀ ਪਹਿਲੀ ਵਾਰ ਅਧਿਕਾਰਤ ਤੌਰ ਤੇ ਪ੍ਰਮੁੱਖ ਵਿਰੋਧੀ ਪਾਰਟੀ ਬਣ ਕੇ ਉੱਭਰੀ ਹੈ। ਪਾਰਟੀ ਨੇਤਾ ਡੈਨੀਅਲ ਸਮਿੱਥ ਦਾ ਕਹਿਣਾ ਹੈ ਕਿ ਉਹਨਾਂ ਨੂੰ ਆਪਣੀਆਂ ਕੁਝ ਨੀਤੀਆਂ ਤੇ ਦੁਬਾਰਾ ਤੋਂ ਗ਼ੌਰ ਕਰਨੀ ਹੋਵੇਗੀ। ਸਮਿੱਥ ਨੇ ਮੰਨਿਆ ਕਿ ਚੋਣਾਂ ਤੋਂ ਕੁਝ ਦਿਨ ਪਹਿਲਾਂ ਉਹਨਾਂ ਦੇ ਦੋ ਉਮੀਦਵਾਰਾਂ ਵੱਲੋਂ ਦਿੱਤੇ ਗਏ ਬਿਆਨਾਂ ਨੇ ਵੀ ਉਹਨਾਂ ਦੀ ਪਾਰਟੀ ਨੂੰ ਫਰਕ ਪਾਇਆ ਹੈ। ਉਹਨਾਂ ਅੱਗੇ ਕਿਹਾ ਕਿ ਲਿਬਰਲ ਅਤੇ ਐੱਨ.ਡੀ.ਪੀ ਵੱਲੋਂ ਟੋਰੀ ਪਾਰਟੀ ਦੀ ਹਮਾਇਤ ਕਰ ਦੇਣ ਨਾਲ਼ ਵੀ ਉਹਨਾਂ ਦੀ ਪਾਰਟੀ ਨੂੰ ਹਾਰ ਦਾ ਸਾਹਮਣਾ ਕਰਨਾ ਪਿਆ ਹੈ।
ਸਮਿੱਥ ਨੇ ਅੱਗੇ ਕਿਹਾ ਕਿ ਸਾਨੂੰ ਆਪਣੀਆਂ ਨੀਤੀਆਂ ਦੇ ਦੁਬਾਰਾ ਤੋਂ ਗ਼ੌਰ ਕਰਨੀ ਹੋਵੇਗੀ ਅਤੇ ਇੱਕ ਵਾਰ ਫਿਰ ਮਿੱਟੀ ਨੂੰ ਫਰੋਲਣਾ ਹੋਵੇਗਾ। ਉਹਨਾਂ ਕਿਹਾ ਕਿ ਉਹਨਾਂ ਦੀ ਪਾਰਟੀ ਦੇ ਮੈਂਬਰਾਂ ਨੂੰ ਪਤਾ ਲੱਗ ਗਿਆ ਹੋਵੇਗਾ ਕਿ ਸਾਡੀਆਂ ਨੀਤੀਆਂ ਤੇ ਅਲਬਰਟਾ ਦੇ ਲੋਕਾਂ ਨੇ ਮੋਹਰ ਨਹੀਂ ਲਾਈ ਹੈ। ਜਿੰਨਾਂ ਨੀਤੀਆਂ ਤੇ ਲੋਕ ਮੋਹਰ ਨਹੀਂ ਲਗਾਉਂਦੇ ਉਹਨਾਂ ਨੂੰ ਰੱਖ ਕੇ ਸਰਕਾਰ ਨਹੀਂ ਬਣਾਈ ਜਾ ਸਕਦੀ।
ਸਮਿੱਥ ਨੇ ਅੱਗੇ ਐਲਾਨ ਕੀਤਾ ਕਿ ਜਦੋਂ ਉਹਨਾਂ ਦੀ ਪਾਰਟੀ ਦੀ ਆਉਂਦੀ ਪਤਝੜ੍ਹ ਵਿੱਚ ਕਨਵੈਨਸ਼ਨ ਹੋਵੇਗੀ ਤਾਂ ਅਜਿਹੀਆਂ ਨੀਤੀਆਂ ਨੂੰ ਏਜੰਡੇ ਤੇ ਰੱਖਿਆ ਜਾਵੇਗਾ। ਸਮਿੱਥ ਨੇ ਟੋਰੀਆਂ ਦੀ ਜਿੱਤ ਤੇ ਕਿਹਾ ਕਿ ਪ੍ਰੀਮੀਅਰ ਰੈੱਡਫੋਰਡ ਨੂੰ ਲਿਬਰਲ ਅਤੇ ਐੱਨ.ਡੀ.ਪੀ. ਦਾ ਵੱਡਾ ਧੰਨਵਾਦ ਕਰਨਾ ਬਣਦਾ ਹੈ।
ਇਹਨਾਂ ਚੋਣਾਂ ਵਿੱਚ ਭਾਰਤੀਆਂ ਨੇ ਵੀ ਵੱਡਾ ਰੋਲ ਅਦਾ ਕੀਤਾ ਹੈ। ਕਈ ਪੁਰਾਣੇ ਨੇਤਾ ਜਿੰਨ੍ਹਾਂ ਵਿੱਚ ਮੰਤਰੀ ਮਨਮੀਤ ਭੁੱਲਰ ਵੀ ਸ਼ਾਮਿਲ ਨੇ ਵੀ ਆਪਣੀ ਜਿੱਤ ਨੂੰ ਬਰਕਰਾਰ ਰੱਖਿਆ ਹੈ। ਇਸ ਤੋਂ ਇਲਾਵਾ ਪੀਟਰ ਸੰਧੂ ਵੀ ਦੁਬਾਰਾ ਤੋਂ ਚੋਣ ਜਿੱਤ ਗਏ ਹਨ।

ਐਮ ਪੀ ਪਰਮ ਗਿੱਲ ਵਲੋਂ ਸੰਸਦ ਵਿੱਚ ਵਿਸਾਖੀ ਸਮਾਗਮ

editor — Thu, 26 Apr 2012 09:59:29 +0000

ਸਟਾਰ ਨਿਊਜ਼:- ਬੀਤੇ ਕੱਲ ਬਰੈਂਪਟਨ-ਸਪਰਿੰਗਡੇਲ ਤੋਂ ਕੰਜ਼ਰਵਟਿਵ ਮੈਂਬਰ ਪਾਰਲੀਮੈਂਟ ਪਰਮ ਗਿੱਲ ਵਲੋਂ ਔਟਵਾ ਵਿਖੇ ਸੰਸਦ ਵਿੱਚ ਵਿਸਾਖੀ ਦੇ ਸਮਾਗਮ ਕਰਵਾਏ ਗਏ। ਇਹ ਪਹਿਲੀ ਵਾਰ ਸੀ ਕਿ ਸੰਸਦ ਵਿੱਚ ਪੰਜਾਬੀ ਗੀਤ ਗੂੰਜੇ। ਵੱਡੀ ਗਿਣਤੀ ਵਿੱਚ ਪੰਜਾਬੀ ਔਟਵਾ ਅਤੇ ਟੋਰਾਂਟੋ ਤੋਂ ਇਸ ਸਮਾਗਮ ਵਿੱਚ ਪਹੁੰਚੇ ਹੋਏ ਸਨ। ਮੁੱਖ ਮਹਿਮਾਨ ਵਜੋਂ ਪ੍ਰਧਾਨ ਮੰਤਰੀ ਸਟੀਫਨ ਹਾਰਪਰ ਪਹੁੰਚੇ ਹੋਏ ਸਨ। ਪਹਿਲਾਂ ਪਰਮ ਗਿੱਲ ਨੇ ਆਏ ਮਹਿਮਾਨਾਂ ਨੂੰ ਵਿਸਾਖੀ ਦੀ ਵਧਾਈ ਦਿੱਤੀ ਉਸ ਤੋਂ ਉਪਰੰਤ ਪ੍ਰਧਾਨ ਮੰਤਰੀ ਨੂੰ ਆਇਆਂ ਆਖਿਆ, ਪ੍ਰਧਾਨ ਮੰਤਰੀ ਨੇ ਆਪਣੇ ਸੰਬੋਧਨ ਵਿੱਚ ਵਿਸਾਖੀ ਦੀ ਵਧਾਈ ਦਿੱਤੀ ਅਤੇ ਕਿਹਾ ਕਿ ਕੈਨੇਡਾ ਦੇ ਸੁਨਿਹਰੀ ਭਵਿੱਖ ਵਿੱਚ ਸਿੱਖਾਂ ਦਾ ਬਹੁਤ ਵੱਡਾ ਯੋਗਦਾਨ ਹੈ। ਸਿੱਖਾਂ ਨੇ ਹਰ ਕੰਮ ਵਿੱਚ ਬਹੁਤ ਤਰੱਕੀ ਕੀਤੀ ਹੈ। ਮਨੋਰੰਜਣ ਲਈ ਗਿੱਧੇ ਅਤੇ ਭੰਗੜੇ ਦੀ ਪੇਸ਼ਕਾਰੀ ਕੀਤੀ ਗਈ। ਇਸ ਸਮਾਗਮ ਨੂੰ ਮੁੱਖ ਤੋਂ ‘ਤੇ ਪਰਮ ਗਿੱਲ ਵਲੋਂ ਅਯੋਜਿਤ ਕੀਤਾ ਗਿਆ ਪਰ ਜਿਹੜੇ ਮੈਂਬਰ ਪਾਰਲੀਮੈਂਟ ਇਸ ਵਿੱਚ ਸ਼ਾਮਿਲ ਹੋਏ ਉਨ੍ਹਾਂ ਵਿੱਚ ਮੰਤਰੀ ਬਲਜੀਤ ਗੋਸਲ, ਟਿਮ ਉੱਪਲ, ਐਮ ਪੀ ਦਵਿੰਦਰ ਸ਼ੋਰੀ, ਕਾਇਲ ਸੀਬੈਕ, ਬਰੈਡ ਬੱਟ, ਸਟੈਲਾ ਐਂਬਲਰ ਅਤੇ ਈਵ ਐਡਮ। ਲਿਬਰਲ ਐਮ ਪੀ ਜਸਟਿਨ ਟ੍ਰੂਡੋ ਵੀ ਪਹੁੰਚੇ ਹੋਏ ਸਨ।