ਨਵੀਂ ਦਿੱਲੀ ¸17ਮਾਰਚ (ਸਟਾਰ ਨਿਊਜ਼)-ਦੇਸ਼ ਦੀ ਪ੍ਰਮੁੱਖ ਵਿਰੋਧੀ ਪਾਰਟੀ ਭਾਜਪਾ ਨੇ ਸੰਸਦ ‘ਚ ਪੇਸ਼ ਕੀਤੇ ਗਏ ਆਮ ਬਜਟ ਨੂੰ ਦੇਸ਼ ਦੇ ਲੋਕਾਂ ਨਾਲ ਧੋਖਾ ਕਰਾਰ ਦਿੰਦੇ ਹੋਏ ਕਿਹਾ ਹੈ ਕਿ ਇਹ ਮਹਿੰਗਾਈ ਦੀ ਮਾਰ ਹੇਠ ਦੱਬੇ ਹੋਏ ਲੋਕਾਂ ਦਾ ਲੱਕ ਤੋੜ ਦੇਵੇਗਾ। ਵਿੱਤ ਮੰਤਰੀ ਵਲੋਂ ਪੇਸ਼ ਬਜਟ ‘ਤੇ ਤਿੱਖੀ ਪ੍ਰਤੀਕਿਰਿਆ ਪ੍ਰਗਟਾਉਂਦਿਆਂ ਭਾਜਪਾ ਦੇ ਕੌਮੀ ਬੁਲਾਰੇ ਸ਼ਾਹਨਵਾਜ ਹੁਸੈਨ ਨੇ ਕਿਹਾ ਕਿ ਆਮਦਨ ਕਰ ਦੀ ਹੱਦ ‘ਚ ਮਾਮੂਲੀ ਵਾਧਾ ਕਰਕੇ ਸਰਕਾਰ ਨੇ ਲੋਕਾਂ ਦੇ ਹੱਥ ਵਿਚ ਲਾਲੀ ਪਾਪ ਫੜਾਇਆ ਹੈ। ਸਰਵਿਸ ਟੈਕਸ ਅਤੇ ਹੋਰ ਧਾਰਾਵਾਂ ‘ਚ ਜਿਸ ਤਰ੍ਹਾਂ ਵਾਧਾ ਕੀਤਾ ਗਿਆ ਹੈ ਉਸ ਨਾਲ ਦੇਸ਼ ਦੇ ਲੋਕਾਂ ‘ਤੇ 40 ਹਜ਼ਾਰ ਕਰੋੜ ਰੁਪਏ ਦਾ ਵਾਧੂ ਭਾਰ ਪਵੇਗਾ।  ਪਾਰਟੀ ਦੇ ਉਪ ਪ੍ਰ੍ਰਧਾਨ ਐੱਮ. ਏ. ਨਕਵੀ ਨੇ ਕਿਹਾ ਕਿ ਸਰਕਾਰ ਨੇ ਨਾਕਾਮ ਹੋ ਚੁੱਕੇ ਅਰਥਸ਼ਾਸਤਰ ਦੇ ਫਾਰਮੂਲੇ ਨੂੰ ਮੁੜ ਤੋਂ ਨਵੇਂ ਢੰਗ ਨਾਲ ਪੇਸ਼ ਕੀਤਾ ਹੈ। ਇਸ ਨਾਲ ਜ਼ਮੀਨ ਤੋਂ ਲੈ ਕੇ ਆਸਮਾਨ ਤਕ ਆਦਮੀ ਨੂੰ ਕਿਤੇ ਵੀ ਰਾਹਤ ਮਿਲਣ ਦੀ ਸੰਭਾਵਨਾ ਨਜ਼ਰ ਨਹੀਂ ਆਉਂਦੀ। ਉਨ੍ਹਾਂ ਨੇ ਕਿਹਾ ਕਿ ਦੀਦੀ ਮਮਤਾ ਦੀ ਬਗਾਵਤ ਦਰਮਿਆਨ ਦਾਦਾ ਦਾ ਇਹ ਬਜਟ ਸਰਕਾਰ ਦੀ ਵਿਦਾਇਗੀ ਦਾ ਬਿਗੁਲ ਸਾਬਤ ਹੋਵੇਗਾ।

ਲੁਧਿਆਣਾ,17ਮਾਰਚ (ਸਟਾਰ ਨਿਊਜ਼)  – ਦੋ ਦਿਨ ਪਹਿਲਾਂ ਹੈਬੋਵਾਲ ਦੇ ਨਵੀਨ ਨਗਰ ਇਲਾਕੇ ਤੋਂ ਲਾਪਤਾ 42 ਸਾਲ ਦੇ ਸਿੱਖ ਤਜਿੰਦਰ ਸਿੰਘ ਜਲੰਧਰ ਬਾਈਪਾਸ ਰੋਡ ‘ਤੇ ਇਕ ਮੈਰਿਜ ਪੈਲੇਸ ਦੇ ਬਾਹਰ ਤੋਂ ਪੁਲਸ ਨੇ ਬਰਾਮਦ ਕਰ ਲਿਆ ਹੈ। ਉਸ ਸਮੇਂ ਉਸ ਦੇ ਸਿਰ ‘ਤੇ ਅਤੇ ਦਾੜੀ ਦੇ ਪੂਰੇ ਵਾਲ ਕੱਟੇ ਹੋਏ ਸਨ ਤੇ ਉਹ ਪੂਰੀ ਤਰ੍ਹਾਂ ਨਾਲ ਕਲੀਨ ਸ਼ੇਵ ਸੀ। ਪੁਲਸ ਅਨੁਸਾਰ ਉਹ ਉਸ ਸਮੇਂ ਨਸ਼ੇ ਵਿਚ ਧੁੱਤ ਸੀ ਤੇ ਪੁਲਸ ਨੂੰ ਕੋਈ ਵੀ ਬਿਆਨ ਦੇਣ ਦੇ ਕਾਬਲ ਨਹੀਂ ਸੀ ਜਿਸ ਕਾਰਨ ਉਸ ਨੂੰ ਇਲਾਜ ਲਈ ਸਿਵਲ ਹਸਪਤਾਲ ਵਿਚ ਦਾਖਲ ਕਰਵਾਇਆ ਗਿਆ ਹੈ। ਜਦਕਿ ਦੂਜੇ ਪਾਸੇ ਤਜਿੰਦਰ ਦੇ ਪਿਤਾ ਵਜ਼ੀਰ ਸਿੰਘ ਤੇ ਭਰਾ ਦਾ ਦੋਸ਼ ਸੀ ਕਿ ਪੈਸਿਆਂ ਦੇ ਲੈਣ-ਦੇਣ ਨੂੰ ਲੈ ਕੇ ਤਜਿੰਦਰ ਨੂੰ ਅਗਵਾ ਕੀਤਾ ਗਿਆ ਅਤੇ ਉਸ ਦੇ ਕੇਸ ਤੇ ਦਾੜੀ ਕੱਟ ਦਿੱਤੀ ਗਈ। ਇਸ ਸਬੰਧੀ ਉਨ੍ਹਾਂ ਨੇ ਚੌਕੀ ਜਗਤਪੁਰੀ ਦੀ ਪੁਲਸ ਨੂੰ ਸ਼ਿਕਾਇਤ ਵੀ ਦਿੱਤੀ ਹੈ ਜਦਕਿ ਇਸ ਤੋਂ ਪਹਿਲਾਂ ਸੀਮੇਂਟ ਸਟੋਰ ਦੇ ਮਾਲਕ ਨੇ ਵੀ ਪੁਲਸ ਨੂੰ ਸ਼ਿਕਾਇਤ ਦਿੱਤੀ ਸੀ ਕਿ ਤਜਿੰਦਰ ਨੇ ਮਾਰਕੀਟ ਦੇ ਕਰੀਬ 11 ਲੱਖ ਦੀ ਪੇਮੈਂਟ ਡੀਲਰਾਂ ਤੋਂ ਹਾਸਲ ਕਰ ਲਈ ਪਰ ਕੰਪਨੀ ਨੂੰ ਉਹ ਨਕਦੀ ਜਮਾ ਨਹੀਂ ਕਰਵਾਈ। ਜਾਣਕਾਰੀ ਦਿੰਦੇ ਹੋਏ ਚੌਕੀ ਮੁਖੀ ਸਤਨਾਮ ਸਿੰਘ ਨੇ ਦੱਸਿਆ ਕਿ ਦੋ ਦਿਨ ਪਹਿਲਾਂ ਪੁਲਸ ਨੇ ਤਜਿੰਦਰ ਦੇ ਗਾਇਬ ਹੋਣ ਸਬੰਧੀ ਗੁੰਮਸ਼ੁਦਗੀ ਰਿਪੋਰਟ ਲਿਖੀ ਸੀ। ਅੱਜ ਪੁਲਸ ਨੇ ਸੂਚਨਾ ਦੇ ਆਧਾਰ ‘ਤੇ ਤਜਿੰਦਰ ਨੂੰ ਨਸ਼ੇ ਦੀ ਹਾਲਤ ਵਿਚ ਜਲੰਧਰ ਬਾਈਪਾਸ ਦੇ ਨੇੜੇ ਬਰਾਮਦ ਕਰਕੇ ਹਸਪਤਾਲ ਵਿਚ ਭੇਜ ਦਿੱਤਾ। ਪੁਲਸ ਨੂੰ ਦਿੱਤੀ ਰਿਪੋਰਟ ਵਿਚ ਤਜਿੰਦਰ ਦੇ ਘਰ ਵਾਲਿਆਂ ਨੇ ਦੱਸਿਆ ਸੀ ਕਿ 14 ਮਾਰਚ ਨੂੰ ਸਵੇਰੇ 11 ਵਜੇ ਤਜਿੰਦਰ ਕੰਮ ‘ਤੇ ਗਿਆ ਸੀ, ਦੇਰ ਰਾਤ ਤਜਿੰਦਰ ਨਾਲ ਗੱਲ ਹੋਈ ਤਾਂ ਉਸ ਦਾ ਕਹਿਣਾ ਸੀ ਕਿ ਉਹ ਹਾਲੇ ਵਾਪਸ ਆ ਜਾਵੇਗਾ। ਜਦ ਬਾਅਦ ਵਿਚ ਉਸ ਦਾ ਮੋਬਾਈਲ ਫੋਨ ਵੀ ਬੰਦ ਹੋਇਆ ਤਾਂ ਸੂਚਨਾ ਪੁਲਸ ਨੂੰ ਦਿੱਤੀ ਗਈ। ਉਨ੍ਹਾਂ ਨੇ ਦੱਸਿਆ ਕਿ ਸਵੇਰੇ ਤਜਿੰਦਰ ਦੇ ਬਰਾਮਦ ਹੋਣ ਦੇ ਬਾਅਦ ਤੇ ਉਸ ਦੇ ਸਿਰ ਦੇ ਦਾੜ੍ਹੀ ਦੇ ਵਾਲ ਕੱਟੇ ਹੋਣ ਦੇ ਬਾਅਦ ਜਾਂਚ ਨੂੰ ਅੱਗੇ ਵਧਾਇਆ ਗਿਆ। ਜਿਸ ਤੋਂ ਪਤਾ ਚੱਲਿਆ ਕਿ 14 ਮਾਰਚ ਦੀ ਰਾਤ ਨੂੰ ਕਲਾਕ ਟਾਵਰ ਦੇ ਨੇੜੇ ਹੋਟਲ ਸਹਾਰਾ ਵਿਚ ਉਸ ਦੀ ਰਾਤ 10 ਵਜ ਕੇ 10 ਮਿੰਟ ‘ਤੇ ਐਂਟਰੀ ਸੀ। 15 ਮਾਰਚ ਨੂੰ ਸਵੇਰੇ 7 ਵਜੇ ਉਸ ਨੇ ਹੋਟਲ ਛੱਡ ਦਿੱਤਾ। ਉਸ ਦੇ ਬਾਅਦ ਪੁਲਸ ਮਲਹੋਤਰਾ ਹੋਟਲ ‘ਚ ਵੀ ਪੁਛਗਿੱਛ ਦੇ ਲਈ ਗਈ। ਪੁਲਸ ਨੂੰ ਤਜਿੰਦਰ ਦੀ ਜੇਬ ‘ਚੋਂ ਚੰਡੀਗੜ੍ਹ ਦੀ ਬੱਸ ਟਿਕਟਾਂ ਵੀ ਬਰਾਮਦ ਹੋਈਆਂ ਹਨ। ਫਿਲਹਾਲ ਮਾਮਲਾ ਸ਼ੱਕੀ ਹੈ, ਤਜਿੰਦਰ ਦੇ ਪੂਰੀ ਤਰ੍ਹਾਂ ਹੋਸ਼ ਵਿਚ ਆਉਣ ਦੇ ਬਾਅਦ ਸੱਚਾਈ ਦਾ ਪਤਾ ਚਲ ਸਕੇਗਾ ਕਿ ਉਸ ਨੂੰ ਕਿਸੇ ਨੇ ਅਗਵਾ ਕਰਕੇ ਅਜਿਹਾ ਕੰਮ ਕੀਤਾ ਹੈ ਜਾਂ ਨਹੀਂ, ਫਿਲਹਾਲ ਪੁਲਸ ਡਾਕਟਰਾਂ ਵਲੋਂ ਉਸ ਨੂੰ ਫਿਟਕਾਰ ਦੇਣ ਦੇ ਇੰਤਜ਼ਾਰ ਵਿਚ ਹੈ।

ਚੰਡੀਗੜ੍ਹ,17ਮਾਰਚ (ਸਟਾਰ ਨਿਊਜ਼) -ਪੰਜਾਬ ਦੇ ਉਪ ਮੁੱਖ ਮੰਤਰੀ ਤੇ ਖੇਡ ਮੰਤਰੀ ਸ. ਸੁਖਬੀਰ ਸਿੰਘ ਬਾਦਲ ਨੇ ਮਹਾਨ ਭਾਰਤੀ ਬੱਲੇਬਾਜ਼ ਸਚਿਨ ਤੇਂਦੁਲਕਰ ਨੂੰ ਅੱਜ ਮੀਰਪੁਰ ਵਿਖੇ ਏਸ਼ੀਆ ਕੱਪ ਦੇ ਬੰਗਲਾਦੇਸ਼ ਵਿਰੁੱਧ ਮੈਚ ਵਿਚ 100ਵਾਂ ਕੌਮਾਂਤਰੀ ਸੈਂਕੜਾ ਲਗਾਉਣ ‘ਤੇ ਵਧਾਈ ਦਿੱਤੀ। ਸਚਿਨ ਤੇਂਦੁਲਕਰ ਨੂੰ ਭੇਜੇ ਵਧਾਈ ਸੰਦੇਸ਼ ਵਿਚ ਸ. ਬਾਦਲ ਨੇ ਕਿਹਾ ਕਿ ਸਚਿਨ ਵਲੋਂ ਆਪਣੇ 23 ਸਾਲਾ ਖੇਡ ਜੀਵਨ ਵਿਚ ਬਣਾਏ ਅਨੇਕਾਂ ਵਿਸ਼ਵ ਕੀਰਤੀਮਾਨਾਂ ਵਿਚ 100ਵਾਂ ਕੌਮਾਂਤਰੀ ਸੈਂਕੜਾ ਇਕ ਵਿਲੱਖਣ ਵਿਸ਼ਵ ਰਿਕਾਰਡ ਹੈ, ਜਿਸ ਉਪਰ ਹਰ ਦੇਸ਼ ਵਾਸੀ ਨੂੰ ਮਾਣ ਹੈ। ਉਨ੍ਹਾਂ ਕਿਹਾ ਕਿ ਸਚਿਨ ਦੇਸ਼ ਦੇ ਸਮੂਹ ਖਿਡਾਰੀਆਂ ਤੇ ਨੌਜਵਾਨਾਂ ਲਈ ਪ੍ਰੇਰਨਾ-ਸ੍ਰੋਤ ਹੈ ਅਤੇ ਇਹ ਸਿੱਧ ਵੀ ਕਰਦਾ ਹੈ ਕਿ ਜੇਕਰ ਕਿਸੇ ਖਿਡਾਰੀ ਵਿਚ ਕੁਝ ਕਰ ਗੁਜ਼ਰਨ ਦੀ ਤਮੰਨਾ ਹੋਵੇ ਤਾਂ ਉਸ ਲਈ ਕੁਝ ਵੀ ਅਸੰਭਵ ਨਹੀਂ ਹੁੰਦਾ। ਖੇਡ ਮੰਤਰੀ ਨੇ ਦੇਸ਼ ਅਤੇ ਖਾਸ ਕਰਕੇ ਪੰਜਾਬ ਦੇ ਨੌਜਵਾਨਾਂ ਤੇ ਖਿਡਾਰੀਆਂ ਨੂੰ ਸੱਦਾ ਦਿੱਤਾ ਕਿ ਉਹ ਨਸ਼ਿਆਂ ਦਾ ਤਿਆਗ ਕਰਕੇ ਖੇਡ ਮੈਦਾਨਾਂ ਵਿਚ ਉਤਰ ਆਉਣ ਅਤੇ ਆਪਣੇ ਦੇਸ਼ ਦਾ ਨਾਂ ਰੌਸ਼ਨ ਕਰਨ।

ਚੰਡੀਗੜ੍ਹ,17ਮਾਰਚ (ਸਟਾਰ ਨਿਊਜ਼) – ਪੰਜਾਬ ਸਰਕਾਰ ਨੇ ਅੱਜ ਦੇਰ ਰਾਤ ਪੰਜਾਬ ਦੇ ਸਿਵਲ ਪ੍ਰਸ਼ਾਸਨ ਵਿਚ ਵੱਡਾ ਫੇਰ-ਬਦਲ ਕਰਦੇ ਹੋਏ  24 ਸੀਨੀਅਰ ਆਈ. ਐੱਸ. ਅਧਿਕਾਰੀਆਂ ਦੇ ਤਬਾਦਲੇ ਕੀਤੇ ਹਨ। ਜਾਰੀ ਹੁਕਮ ਅਨੁਸਾਰ ਨਵ-ਨਿਯੁਕਤ ਮੁਖ ਸਕੱਤਰ ਰਾਕੇਸ਼ ਸਿੰਘ ਨੂੰ ਪ੍ਰਸ਼ਾਸਕੀ ਸੁਧਾਰ ਤੇ ਵਿਜੀਲੈਂਸ ਵਿਭਾਗ ਦਾ ਵਾਧੂ ਕਾਰਜ ਭਾਰ ਵੀ ਸੌਂਪਿਆ ਗਿਆ ਹੈ। ਹੋਰ ਤਬਾਦਲਿਆਂ ਵਿਚ ਗੁਰਿੰਦਰਜੀਤ ਸਿੰਘ ਸੰਧੂ, ਵਿੱਤ ਕਮਿਸ਼ਨਰ, ਪਸ਼ੂ ਪਾਲਣ ਅਤੇ ਡੇਅਰੀ ਵਿਕਾਸ ਨੂੰ ਬਦਲ ਕੇ ਵਿੱਤ ਕਮਿਸ਼ਨਰ ਵਿਕਾਸ, ਐੱਨ. ਐੱਸ. ਕੰਗ ਵਿੱਤ ਕਮਿਸ਼ਨਰ ਵਿਕਾਸ ਨੂੰ ਇਸੇ ਅਹੁਦੇ ‘ਤੇ ਮਾਲ, ਰਾਹਤ ਅਤੇ ਪੁਨਰਵਾਸ, ਏ. ਆਰ. ਤਲਵਾੜ, ਵਿੱਤ ਕਮਿਸ਼ਨਰ ਮਾਲ ਅਤੇ ਮੁੱਖ ਸਕੱਤਰ ਸੂਚਨਾ ਤਕਨਾਲੋਜੀ ਨੂੰ ਬਦਲ ਕੇ ਮੁੱਖ ਸਕੱਤਰ ਉਦਯੋਗ ਅਤੇ ਸੂਚਨਾ ਤਕਨਾਲੋਜੀ, ਸੁਰੇਸ਼ ਕੁਮਾਰ ਵਿੱਤ ਕਮਿਸ਼ਨਰ ਸਹਿਕਾਰਤਾ ਅਤੇ ਮੁੱਖ ਸਕੱਤਰ ਤਕਨੀਕੀ ਸਿੱਖਿਆ ਨੂੰ ਮੁੱਖ ਸਕੱਤਰ ਸਥਾਨਕ ਸਰਕਾਰ ਵਿਭਾਗ, ਜਸਪਾਲ ਸਿੰਘ ਸੰਧੂ ਮੁੱਖ ਸਕੱਤਰ ਸੁਤੰਤਰਤਾ ਸੈਨਾਨੀ ਅਤੇ ਪ੍ਰੋਗਰਾਮ ਲਾਗੂ ਕਰਨ ਸੰਬੰਧੀ ਵਿਭਾਗ ਨੂੰ ਵਿੱਤ ਕਮਿਸ਼ਨਰ ਪਸ਼ੂ ਪਾਲਣ ਅਤੇ ਡੇਅਰੀ ਵਿਕਾਸ ਵਿਭਾਗ, ਕੇ. ਵੀ. ਐੱਸ. ਸਿੱਧੂ ਮੁੱਖ ਸਕੱਤਰ, ਵਿੱਤ ਅਤੇ ਸੰਸਕ੍ਰਿਤ ਮਾਮਲੇ ਵਿਭਾਗ ਨੂੰ ਸਿੰਚਾਈ ਵਿਭਾਗ, ਸਤੀਸ਼ ਚੰਦਰਾ ਮੁੱਖ ਸਕੱਤਰ ਯੋਜਨਾ, ਵਿਸ਼ੇਸ਼ ਆਰਥਿਕ ਪੈਕੇਜ, ਪ੍ਰਸ਼ਾਸਕੀ ਸੁਧਾਰ ਕਮਿਸ਼ਨ ਅਤੇ ਸਿਹਤ ਵਿਭਾਗ ਤੋਂ ਬਦਲ ਕੇ ਮੁੱਖ ਸਕੱਤਰ ਵਿੱਤ, ਯੋਜਨਾ ਅਤੇ ਵਿਸ਼ੇਸ਼ ਪੈਕੇਜ ਤੇ ਪ੍ਰੋਗਰਾਮ ਲਾਗੂ ਕਰਨ ਸੰਬੰਧੀ ਵਿਭਾਗ ਵਿਚ ਲਾਇਆ ਗਿਆ ਹੈ। ਕਰਨ ਅਵਤਾਰ ਸਿੰਘ ਚੇਅਰਮੈਨ ਪੰਜਾਬ ਸਟੇਟ ਟੈਕਨੀਕਲ ਐਜੂਕੇਸ਼ਨ ਬੋਰਡ ਨੂੰ ਮੁੱਖ ਸਕੱਤਰ ਸਾਇੰਸ ਤਕਨਾਲੋਜੀ, ਚੌਗਿਰਦਾ ਅਤੇ ਗੈਰ ਪਰੰਪਰਾਗਤ ਊਰਜਾ, ਕਲਪਨਾ ਮਿੱਤਰ ਬਰੂਆ ਮੁੱਖ ਰੈਜੀਡੈਂਟ ਕਮਿਸ਼ਨਰ ਨੂੰ ਮੁੱਖ ਸਕੱਤਰ ਨਿਵੇਸ਼ ਉਤਸ਼ਾਹ ਲਗਾਇਆ ਗਿਆ ਹੈ ਅਤੇ ਉਨ੍ਹਾਂ ਕੋਲ ਪ੍ਰਿੰਸੀਪਲ ਰੈਜ਼ੀਡੈਂਸ ਕਮਿਸ਼ਨਰ ਦਿੱਲੀ ਦਾ ਕੰਮ ਵੀ ਰਹੇਗਾ। ਵਿੰਨੀ ਮਹਾਜਨ, ਜਿਨ੍ਹਾਂ ਨੇ ਪ੍ਰਤੀ ਨਿਯੁਕਤੀ ਤੋਂ ਭਾਰਤ ਸਰਕਾਰ ਨੂੰ ਵਾਪਸ ਮੁੜਨਾ ਹੈ, ਸਿਹਤ ਅਤੇ ਪਰਿਵਾਰ ਕਲਿਆਣ ਵਿਭਾਗ ਦਾ ਮੁੱਖ ਲਾਇਆ ਗਿਆ ਹੈ। ਐੱਸ. ਕੇ. ਸੰਧੂ ਜੋ ਕਿ ਮੁਖ ਮੰਤਰੀ ਦੇ ਮੁੱਖ ਸਕੱਤਰ ਵੀ ਹਨ, ਤੋਂ ਪੀ. ਡਬਲਯੂ. ਡੀ. ਵਿਭਾਗ ਵਾਪਸ ਲੈ ਲਿਆ ਹੈ। ਵਿਸ਼ਵਜੀਤ ਖੰਨਾ ਜੋ ਕਿ ਉਪ ਮੁਖ ਮੰਤਰੀ ਸੁਖਬੀਰ ਬਾਦਲ ਦੇ ਮੁੱਖ ਸਕੱਤਰ ਹਨ, ਨੂੰ ਵਿੱਤ ਕਮਿਸ਼ਨਰ ਸਹਿਕਾਰਤਾ ਅਤੇ ਮੁੱਖ ਸਕੱਤਰ ਸਿਵਲ ਐਵੀਏਸ਼ਨ ਵਿਭਾਗ ਲਾਇਆ ਗਿਆ ਹੈ। ਸੰਜੇ ਕੁਮਾਰ ਐੱਮ. ਡੀ. ਪੰਜਾਬ ਐਗਰੋ ਇੰਡਸਟਰੀ ਕਾਰਪੋਰੇਸ਼ਨ ਨੂੰ ਜਲ ਸਪਲਾਈ ਅਤੇ ਸੈਨੀਟੇਸ਼ਨ ਵਿਭਾਗ ਦਾ ਸਕੱਤਰ, ਅੰਜਲੀ ਭਾਵੜਾ ਨੂੰ ਮੈਡੀਕਲ ਅਤੇ ਸਿੱਖਿਆ, ਬਿਜਲੀ ਸੂਚਨਾ ਤੇ ਜਨ ਸੰਪਰਕ ਵਿਭਾਗ ਦੇ ਸਕੱਤਰ ਅਨਿਰੁਧ ਤਿਵਾੜੀ ਨੂੰ ਆਮ ਪ੍ਰਸ਼ਾਸਨ ਅਤੇ ਪ੍ਰਸੋਨਲ ਵਿਭਾਗ ਦੀ ਦਿਤੇ ਗਏ ਹਨ। ਜਨ ਸੰਪਰਕ ਵਿਭਾਗ ਹੁਣ ਉਨ੍ਹਾਂ ਕੋਲ ਵਾਧੂ ਤੌਰ ‘ਤੇ ਰੱਖਿਆ ਗਿਆ ਹੈ। ਜਲ ਸਪਲਾਈ ਤੇ ਸੈਨੀਟੇਸ਼ਨ ਵਿਭਾਗ ਦੇ ਸਕੱਤਰ ਪੀ. ਐੱਸ. ਔਜਲਾ ਨੂੰ ਪੀ. ਡਬਲਯੂ. ਡੀ., ਖੇਡ ਤੇ ਯੁਵਾ ਮਾਮਲੇ ਵਿਭਾਗ, ਫਿਰੋਜ਼ਪੁਰ ਤੇ ਫਰੀਦਕੋਟ ਦੇ ਮੰਡਲ ਕਮਿਸ਼ਨਰ ਅਤੇ ਸਥਾਨਕ ਸਰਕਾਰ ਵਿਭਾਗ ਦੇ ਸਕੱਤਰ ਰਮਿੰਦਰ ਸਿੰਘ ਹੁਣ ਫਿਰੋਜ਼ਪੁਰ ਅਤੇ ਫਰੀਦਕੋਟ ਦੇ ਕਮਿਸ਼ਨਰ ਹੀ ਹੋਣਗੇ ਅਤੇ ਸਥਾਨਕ ਸਰਕਾਰ ਵਿਭਾਗ ਵਾਪਸ ਲੈ ਲਿਆ ਗਿਆ ਹੈ। ਤਾਲਮੇਲ ਅਤੇ ਮਾਲ ਵਿਭਾਗ ਦੇ ਸਕੱਤਰ ਅਸ਼ੋਕ ਗੁਪਤਾ ਨੂੰ ਐੱਮ. ਡੀ. ਪੰਜਾਬ ਐਗਰੋ ਲਾਇਆ ਗਿਆ ਹੈ ਅਤੇ ਤਾਲਮੇਲ ਵਿਭਾਗ ਉਨ੍ਹਾਂ ਕੋਲ ਹੁਣ ਵਾਧੂ ਹੋਵੇਗਾ। ਫੂਡ ਤੇ ਸਿਵਲ ਸਪਲਾਈ ਵਿÎਭਾਗ ਦੇ ਸਕੱਤਰ ਡੀ. ਐੱਸ. ਗਰੇਵਾਲ ਨੂੰ ਫੂਡ ਪ੍ਰੋਸੈਸਿੰਗ ਵਿਭਾਗ ਦਾ ਵਾਧੂ ਕਾਰਜ ਭਾਰ ਵੀ ਦਿਤਾ ਗਿਆ ਹੈ। ਹਿੰਮਤ ਸਿੰਘ ਪ੍ਰਿੰਸੀਪਲ ਰੈਜੀਡੈਂਟ ਕਮਿਸ਼ਨਰ ਨੂੰ ਸੂਬਾ ਮਹਿਲਾ ਕਮਿਸ਼ਨ ਦਾ ਸਕੱਤਰ ਮੈਂਬਰ, ਸਰਵੇਸ਼ ਕੌਸ਼ਲ ਨੂੰ ਇਸ ਅਹੁਦੇ ਤੋਂ ਬਦਲ ਕੇ ਮੁੱਖ ਸਕੱਤਰ ਸੁਤੰਤਰਤਾ ਸੈਨਾਨੀ, ਉਦਯੋਗ ਅਤੇ ਵਪਾਰ ਵਿਭਾਗ ਦੇ ਮੁੱਖ ਸਕੱਤਰ ਐੱਸ. ਐੱਸ. ਚੰਨੀ ਨੂੰ ਸਭਿਆਚਾਰਕ ਮਾਮਲੇ, ਤਕਨੀਕੀ ਸਿੱਖਿਆ ਅਤੇ Àੁਦਯੋਗਿਕ ਸਿਖਲਾਈ ਵਿਭਾਗ ਦਾ ਮੁੱਖ ਸਕੱਤਰ ਅਤੇ ਪ੍ਰਸੋਨਲ ਅਤੇ ਆਮ ਪ੍ਰਸ਼ਾਸਨ ਵਿਭਾਗ ਦੇ ਸਕੱਤਰ ਬੀ. ਐੱਸ. ਸੂਦਨ ਨੂੰ ਤਬਦੀਲ ਕਰ ਕੇ ਮਾਲ ਵਿਭਾਗ ਦਾ ਸਕੱਤਰ ਲਾਇਆ ਗਿਆ ਹੈ। ਉਹ ਵਫਕ ਬੋਰਡ ਦੇ ਸਰਵੇ ਕਮਿਸ਼ਨਰ ਵੀ ਹੋਣਗੇ।

ਪਟਿਆਲਾ,17ਮਾਰਚ (ਸਟਾਰ ਨਿਊਜ਼)  – ਵਿਧਾਨ ਸਭਾ ਚੋਣਾਂ ਵਿਚ ਕਾਂਗਰਸ ਦੀ ਹਾਰ ਤੋਂ ਬਾਅਦ ਪੰਜਾਬ ਕਾਂਗਰਸ ਦੇ ਪ੍ਰਧਾਨ ਕੈਪਟਨ ਅਮਰਿੰਦਰ ਸਿੰਘ ਦੇ ਖਿਲਾਫ਼ ਬਗਾਵਤ ਦੀਆਂ ਸੁਰਾਂ ਉੱਠਣੀਆਂ ਸ਼ੁਰੂ ਹੋ ਗਈਆਂ ਹਨ। ਸ਼ੁੱਕਰਵਾਰ ਨੂੰ ਕੈਪਟਨ ਅਮਰਿੰਦਰ ਸਿੰਘ ਦੇ ਜੱਦੀ ਸ਼ਹਿਰ ਤੋਂ ਕਾਂਗਰਸੀ ਵਰਕਰਾਂ ਨੇ ‘ਅਮਰਿੰਦਰ ਭਜਾਓ ਕਾਂਗਰਸ ਬਚਾਓ’ ਮੁਹਿੰਮ ਦਾ ਆਗਾਜ਼ ਕਰ ਦਿੱਤਾ ਹੈ। ਟਕਸਾਲੀ ਕਾਂਗਰਸੀ ਆਗੂ ਤੇ ਜ਼ਿਲਾ ਕਾਂਗਰਸ ਕਮੇਟੀ ਦਿਹਾਤੀ ਦੇ ਸਾਬਕਾ ਜਨਰਲ ਸਕੱਤਰ ਸੰਤ ਸਿੰਘ ਘੱਗਾ ਦੀ ਅਗਵਾਈ ਵਿਚ ਵਰਕਰਾਂ ਨੇ ਛੋਟੀ ਬਾਰਾਂਦਰੀ ਸਥਿਤ ਕਾਂਗਰਸ ਦੇ ਮਰਹੂਮ ਮੁੱਖ ਮੰਤਰੀ ਅਮਰ ਸ਼ਹੀਦ ਸ. ਬੇਅੰਤ ਸਿੰਘ ਦੇ ਆਦਮਕੱਦ ਬੁੱਤ ‘ਤੇ ਨਮਨ ਕਰਕੇ ਇਸ ਮੁਹਿੰਮ ਦਾ ਆਗਾਜ਼ ਕੀਤਾ। ਆਗੂਆਂ ਨੇ ਅਮਰਿੰਦਰ ਭਜਾਓ ਕਾਂਗਰਸ ਬਚਾਓ ਦੇ ਮਾਟੋ ਚੁੱਕੇ ਹੋਏ ਸਨ, ਉਹ ਸੋਨੀਆ ਗਾਂਧੀ ਜ਼ਿੰਦਾਬਾਦ ਦੇ ਨਾਅਰੇ ਲਗਾ ਰਹੇ ਸਨ ਪਰ ਕੈਪਟਨ ਅਮਰਿੰਦਰ ਸਿੰਘ ਮੁਰਦਾਬਾਦ ਦੇ ਨਾਅਰੇ ਵੀ ਲਗਾ ਰਹੇ ਸਨ। ਇਸ ਮੌਕੇ ਵਰਕਰਾਂ ਨੂੰ ਸੰਬੋਧਨ ਕਰਦਿਆਂ ਸੰਤ ਸਿੰਘ ਘੱਗਾ ਨੇ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਦੀਆਂ ਮਾਰੂ ਨੀਤੀਆਂ ਕਾਰਨ ਅੱਜ ਪੰਜਾਬ ਵਿਚ ਕਾਂਗਰਸ ਸਰਕਾਰ ਬਣਨ ਤੋਂ ਰਹਿ ਗਈ। ਉਨ੍ਹਾਂ ਕਿਹਾ ਕਿ ਪੰਜਾਬ ਦੇ ਲੋਕ ਕਾਂਗਰਸ ਦੀ ਸਰਕਾਰ ਬਣਾਉਣਾ ਚਾਹੁੰਦੇ ਸਨ ਪਰ ਕੈਪਟਨ ਦੇ ਅੜੀਅਲ ਤੇ ਹੰਕਾਰੀ ਰਵੱਈਏ ਕਾਰਨ ਕਾਂਗਰਸ ਦੀ ਸਰਕਾਰ ਨਾ ਬਣ ਸਕੀ। ਕੈਪਟਨ ਅਮਰਿੰਦਰ ਸਿੰਘ ਨੇ ਜਿੱਥੇ ਟਿਕਟਾਂ ਦੀ ਵੰਡ ਵਿਚ ਘਪਲੇਬਾਜੀ ਕੀਤੀ, ਉੁਥੇ ਵਰਕਰਾਂ ਨੂੰ ਨਾ ਮਿਲਣਾ, ਕੁਝ ਲੋਕਾਂ ਦੇ ਹੱਥਾਂ ਦੀ ਕਠਪੁਤਲੀ ਬਣਨਾ ਅਤੇ ਹਵਾਈ ਕਿਲੇ ਬਣਾਉੁਣ ਕਾਰਨ ਪੰਜਾਬ ਵਿਚ ਕਾਂਗਰਸ ਦੀ ਸਰਕਾਰ ਨਹੀਂ ਬਣ ਸਕੀ। ਉਨ੍ਹਾਂ ਕਿਹਾ ਕਿ ਅਮਰਿੰਦਰ ਸਿੰਘ ਕਿਸੇ ਬਾਗੀ ਨੂੰ ਮਨਾਉਣ ਨਹੀਂ ਗਿਆ, ਜਿਨ੍ਹਾਂ ਟਕਸਾਲੀ ਪਰਿਵਾਰਾਂ ਨੇ ਅੱਤਵਾਦ ਦੇ ਖਿਲਾਫ ਲੜਾਈ ਲੜੀ ਉਨ੍ਹਾਂ ਪਰਿਵਾਰਾਂ ਦੀਆਂ ਟਿਕਟਾਂ ਕੱਟੀਆਂ ਗਈਆਂ। ਕੈਪਟਨ ਅਮਰਿੰਦਰ ਸਿੰਘ ਅਕਾਲੀਆਂ ਨੂੰ ਹਰਾਉਣ ਦੀ ਬਜਾਇ ਆਪਣੇ ਰਾਜਸੀ ਵਿਰੋਧੀ ਕਾਂਗਰਸੀ ਉਮੀਦਵਾਰਾਂ ਨੂੰ ਹੀ ਹਰਾਉਣ ‘ਚ ਲੱਗਿਆ ਰਿਹਾ। ਉਨ੍ਹਾਂ ਕਿਹਾ ਕਿ ਜਿਹੜਾ ਆਗੂ ਆਪਣੇ ਵਰਕਰਾਂ ਨੂੰ ਨਾ ਮਿਲੇ, ਕਿਸੇ ਦੇ ਦੁੱਖ-ਸੁੱਖ ਵਿਚ ਨਾ ਖੜ੍ਹੇ ਅਜਿਹੇ ਆਗੂ ਤੋਂ ਕਾਂਗਰਸ ਨੂੰ ਕੀ ਉਮੀਦ ਹੋ ਸਕਦੀ ਹੈ। ਉਨ੍ਹਾਂ ਕਿਹਾ ਕਿ ਕੈਪਟਨ ਦੇ ਹੈਂਕੜਬਾਜ ਰਵੱਈਏ ਕਾਰਨ ਪੰਜਾਬ ਦੇ ਕਾਂਗਰਸੀ ਵਰਕਰ ਬੇਹੱਦ ਨਾਰਾਜ਼ ਹਨ ਤੇ ਇਸੇ ਲਈ ਅੱਜ ਉਹ ਸੜਕਾਂ ‘ਤੇ ਉਤਰਨ ਨੂੰ ਮਜ਼ਬੂਰ ਹੋਏ ਹਨ। ਉਨ੍ਹਾਂ ਕਾਂਗਰਸ ਹਾਈ ਕਮਾਂਡ ਤੋਂ ਮੰਗ ਕੀਤੀ ਕਿ ਪੰਜਾਬ ਵਿਚ ਕਾਂਗਰਸ ਨੂੰ ਬਚਾਉੁਣ ਲਈ ਅਮਰਿੰਦਰ ਦੀ ਛੁੱਟੀ ਕਰਕੇ ਆਮ ਲੋਕਾਂ ਨਾਲ ਜੁੜੇ ਕਿਸੇ ਆਗੂ ਨੂੰ ਪੰਜਾਬ ਦਾ ਪ੍ਰਧਾਨ ਥਾਪਿਆ ਜਾਵੇ ਤਾਂ ਜੋ 2014 ਵਿਚ ਹੋਣ ਵਾਲੀਆਂ ਲੋਕ ਸਭਾ ਚੋਣਾਂ ‘ਚ ਕਾਂਗਰਸ ਪਾਰਟੀ ਅਕਾਲੀਆਂ ਦਾ ਸਫਾਇਆ ਕਰ ਸਕੇ। ਮੋਤੀ ਮਹਿਲ ਪੱਖੀ ਅਮਰਿੰਦਰ ਦੇ ਹੱਕ ‘ਚ ਅੱਗੇ ਆਏ : ਪਟਿਆਲਾ ਵਿਚ ਕੈਪਟਨ ਅਮਰਿੰਦਰ ਦੇ ਖਿਲਾਫ਼ ਹੋਏ ਇਸ ਪ੍ਰਦਰਸ਼ਨ ਨੂੰ ਕੈਪਟਨ ਅਮਰਿੰਦਰ ਦੇ ਸਮਰਥਕਾਂ ਨੇ ਫੋਕੀ ਢਕੋਂਸਲੇਬਾਜੀ ਦਿੱਤੀ ਹੈ। ਕੈਪਟਨ ਅਮਰਿੰਦਰ ਸਿੰਘ ਦੇ ਕਵਰਿੰਗ ਉਮੀਦਵਾਰ ਤੇ ਇੰਪਰੂਵਮੈਂਟ ਟਰੱਸਟ ਪਟਿਆਲਾ ਦੇ ਸਾਬਕਾ ਚੇਅਰਮੈਨ ਕੇ. ਕੇ. ਸ਼ਰਮਾ ਨੇ ਕਿਹਾ ਕਿ ਜਿਹੜੇ ਲੋਕ ਫੋਕੀ ਸ਼ੋਹਰਤ ਹਾਸਲ ਕਰਨ ਲਈ ਛੋਟੀ ਬਾਰਾਂਦਰੀ ਵਿਖੇ ਡਰਾਮਾ ਕਰਕੇ ਗਏ ਹਨ, ਉਨ੍ਹਾਂ ਦਾ ਕਾਂਗਰਸ ਨਾਲ ਕੋਈ ਸਬੰਧ ਨਹੀਂ। ਉਨ੍ਹਾਂ ਕਿਹਾ ਕਿ ਸੰਤ ਸਿੰਘ ਘੱਗਾ ਹਲਕਾ ਸ਼ੁਤਰਾਣਾ ਨਾਲ ਸਬੰਧਿਤ ਹਨ, ਜੇਕਰ ਉਨ੍ਹਾਂ ਕਾਂਗਰਸ ਦੀ ਮਦਦ ਕੀਤੀ ਹੁੰਦੀ ਤਾਂ ਸ਼ੁਤਰਾਣਾ ਵਿਚ ਕਾਂਗਰਸੀ ਉਮੀਦਵਾਰ 765 ਵੋਟਾਂ ਦੇ ਫਰਕ ਨਾਲ ਨਾ ਹਾਰਦਾ। ਕੇ. ਕੇ. ਸ਼ਰਮਾ ਨੇ ਕਿਹਾ ਕਿ ਕੈਪਟਨ ਅਮਰਿੰਦਰ ਸਿੰਘ ਪੰਜਾਬ ਦੇ ਹਰਮਨ-ਪਿਆਰੇ ਆਗੂ ਹਨ, ਅੱਜ ਵੀ ਸਮੁੱਚੇ ਪੰਜਾਬੀ ਉਨ੍ਹਾਂ ਨੂੰ ਸਭ ਤੋਂ ਵਧ ਮਾਨ ਸਤਿਕਾਰ ਦਿੰਦੇ ਹਨ। ਜ਼ਿਲਾ ਯੂਥ ਕਾਂਗਰਸ ਦੇ ਸਾਬਕਾ ਪ੍ਰਧਾਨ ਸੰਜੀਵ ਬਿੱਟੂ ਨੇ ਕਿਹਾ ਕਿ ਛੋਟੀ ਬਾਰਾਂਦਰੀ ਵਿਖੇ 15-20 ਲੋਕ ਹਾਜ਼ਰ ਸਨ, ਜੋ ਕਿ ਪਟਿਆਲਾ ਤੋਂ ਬਾਹਰਲੇ ਸਨ। ਉਨ੍ਹਾਂ ਕਿਹਾ ਕਿ ਪਟਿਆਲਾ ਸ਼ਹਿਰ ਦਾ ਇਕ ਵੀ ਕਾਂਗਰਸੀ ਵਰਕਰ ਉਥੇ ਮੌਜੂਦ ਨਹੀਂ ਸੀ, ਸਮੁੱਚੇ ਕਾਂਗਰਸੀ ਕੈਪਟਨ ਅਮਰਿੰਦਰ ਸਿੰਘ ਨਾਲ ਖੜ੍ਹੇ ਹਨ।

ਵਾਸ਼ਿੰਗਟਨ- 16 ਮਾਰਚ(ਸਟਾਰ ਨਿਊਜ਼) ਅਮਰੀਕਾ ਨੇ ਇਕ ਕੌਮਾਂਤਰੀ ਅੰਤਰ ਬੈਂਕਿੰਗ ਵਿੱਤੀ ਸੰਚਾਰ ਸੰਸਥਾਨ ਵੱਲੋਂ ਇਰਾਨੀ ਬੈਂਕਾਂ ਲਈ ਸੇਵਾਵਾਂ ਸਮਾਪਤ ਕੀਤੇ ਜਾਣ ਦਾ ਸਵਾਗਤ ਕਰਦੇ ਹੋਏ ਕਿਹਾ ਕਿ ਇਸ ਤੋਂ ਪਤਾ ਲੱਗਦਾ ਹੈ ਕਿ ਇਰਾਨ ਨੂੰ ਆਪਣੇ ਵਿਵਹਾਰ ਦੀ ਕੀਮਤ ਚੁਕਾਉਣੀ ਹੋਵੇਗੀ।
‘ਸੋਸਾਇਟੀ ਫਾਰ ਵਰਲਡਵਾਈਡ ਇੰਟਰਬੈਂਕ ਫਾਈਨੇਂਸ਼ਿਅਲ ਯੁਨੀਕੇਸ਼ਨ’ ਨੇ ਇਰਾਨੀ ਬੈਂਕਾਂ ਲਈ ਆਪਣੀਆਂ ਸੇਵਾਵਾਂ ਖਤਮ ਕਰਨ ਦਾ ਫੈਸਲਾ ਲਿਆ ਹੈ।
ਵਾਈਟ ਹਾਊਸ ਦੇ ਪ੍ਰੈਸ ਸਕੱਤਰ ਜੇ. ਕਾਰਨੀ ਨੇ ਕਿਹਾ, ”ਇਹ ਪਾਬੰਦੀਆਂ ਨੂੰ ਸਖਤ ਕਰਨ ਦਾ ਹਿੱਸਾ ਹੈ। ਇਹ ਇਰਾਨ ਨੂੰ ਅਲੱਗ-ਥਲੱਗ ਕਰਨ ਅਤੇ ਇਰਾਨੀ ਨੇਤਾਵਾਂ ਨੂੰ ਇਹ ਸਾਫ ਕਰ ਦੇਣ ਦੀ ਪ੍ਰਕਿਰਿਆ ਦਾ ਹਿੱਸਾ ਹੈ ਹੈ ਕੌਮਾਂਤਰੀ ਜ਼ਿੰਮੇਵਾਰੀਆਂ ਦੇ ਪਾਲਣ ਤੋਂ ਇਨਕਾਰ ਅਤੇ ਕੌਮਾਂਤਰੀ ਸਮੁਦਾਏ ਨੂੰ ਆਪਣੇ ਪਰਮਾਣੂ ਪ੍ਰੋਗਰਾਮ ਦੇ ਸ਼ਾਂਤੀ ਪੂਰਨ ਹੋਣ ਦਾ ਲੋੜੀਂਦਾ ਭਰੋਸਾ ਦੇਣ ਤੋਂ ਇਨਕਾਰ ਕਰਨ ਦੀ ਇਰਾਨ ਨੂੰ ਕੀਮਤ ਚੁਕਾਉਣੀ ਹੋਵੇਗੀ।”