ਪੰਜਾਬ ਸਟਾਰ- ਲਿਬਰਲ ਦੇ ਰਾਸ਼ਟਰੀ ਨੇਤਾ ਮਾਈਕਲ ਇਗਨਾਟਿਫ ਨੇ ਆਪਣਾ ਗਰਮ ਰੁੱਤ ਦਾ ਕੈਨੇਡਾ ਭਰ ਦਾ ਬੱਸ ਟੂਰ ਖ਼ਤਮ ਕਰ ਲਿਆ ਹੈ। ਟੂਰ ਦੇ ਅੰਤਮ ਪੜਾਅ ਤੋਂ ਬਾਅਦ ਉਹ ਕਾਕਸ ਮੀਟਿੰਗ ਵਿੱਚ ਰੁੱਝ ਗਏ ਜਿੱਥੇ ਇੱਕ ਹੀ ਮੁੱਦੇ ਤੇ ਗੱਲਬਾਤ ਕੇਂਦਰਿਤ ਹੋਣ ਦੀ ਸੰਭਾਵਨਾ ਸੀ। ਇਹ ਮੁੱਦਾ ਹੈ ਪਤਝੜ੍ਹ ਵਿੱਚ ਚੋਣਾਂ ਕਰਾਉਣ ਦਾ। ਇਹ ਤਿੰਨ ਦਿਨਾਂ ਮਿਲਣੀ ਵਿੱਚ 20 ਸਤੰਬਰ ਤੋਂ ਸ਼ੁਰੂ ਹੋ ਰਹੇ ਪਾਰਲੀਮੈਂਟ ਇਜਲਾਸ ਸਬੰਧੀ ਨੀਤੀ ਬਣਾਈ ਜਾਣੀ ਹੈ ਅਤੇ ਚੋਣਾਂ ਕਰਾਉਣ ਦੀ ਸੰਭਾਵਨਾਂਵਾਂ ਦਾ ਪਤਾ ਲਗਾਇਆ ਜਾਣਾ ਹੈ।
ਸੋਮਵਾਰ ਨੂੰ ਉਹਨਾਂ ਨੇ ਆਪਣੀ ਪਾਰਟੀ ਦੀ ਸਲਾਨਾ ਮੀਟਿੰਗ ਤੋਂ ਪਹਿਲਾਂ ਕੋਈ ਪੱਤਾ ਨਹੀਂ ਖੋਲ੍ਹਿਆ। ਚੋਣਾਂ ਦੇ ਮੁੱਦੇ ਤੇ ਉਹਨਾਂ ਸਿਰਫ ਏਨਾ ਕਿਹਾ ਕਿ ਅਸੀਂ ਸਰਕਾਰ ਦੇ ਮੂੰਹ ਵੱਲ ਵੇਖਾਂਗੇ ਕਿ ਉਹ ਕੀ ਕਰ ਰਹੀ ਹੈ ਅਤੇ ਉਸ ਤੋਂ ਬਾਅਦ ਚੋਣਾਂ ਬਾਰੇ ਸੋਚਾਂਗੇ। ਉਹਨਾਂ ਕਿਹਾ ਕਿ ਅਗਰ ਸਰਕਾਰ ਦੂਸਰੀਆਂ ਪਾਰਟੀਆਂ ਨਾਲ਼ ਮਿਲ ਕੇ ਚੱਲਦੀ ਹੈ ਤਾਂ ਠੀਕ ਹੈ ਨਹੀਂ ਤਾਂ ਸਾਨੂੰ ਸਾਡੀ ਜਿ਼ੰਮੇਵਾਰੀ ਸੰਭਾਲਣੀ ਪਵੇਗੀ। ਜਲਦੀ ਹੀ ਉਹਨਾਂ ਇਹ ਵੀ ਕਹਿ ਦਿੱਤਾ ਕਿ ਅਸੀਂ ਕੋਈ ਝਗੜਾ ਨਹੀਂ ਚਾਹੁੰਦੇ। ਪਰ ਸਿਆਸੀ ਪੰਡਤਾਂ ਦਾ ਕਹਿਣਾ ਹੈ ਕਿ ਇਸ ਤਿੰਨ ਦਿਨਾਂ ਮੀਟਿੰਗ ਵਿੱਚ ਵਿਚਾਰ ਏਹੀ ਕੀਤਾ ਜਾਣਾ ਹੈ ਕਿ ਸਟੀਫਨ ਹਾਰਪਰ ਦੀ ਘੱਟ ਗਿਣਤੀ ਸਰਕਾਰ ਦੀ ਲੱਤ ਕਦੋਂ ਖਿੱਚਣੀ ਹੈ।
ਬਹੁਤ ਸਾਰੇ ਲਿਬਰਲ ਨੀਤੀਘਾੜੇ ਇਸ ਗੱਲ ਦੇ ਹਾਮੀ ਹਨ ਕਿ ਟੋਰੀ ਸਰਕਾਰ ਨੂੰ ਅਗਲੇ ਸਾਲ ਬਹਾਰ ਰੁੱਤ ਤੱਕ ਸਮਾਂ ਦੇ ਦੇਣਾ ਚਾਹੀਦਾ ਹੈ ਕਿਉਂ ਕਿ ਉਦੋਂ ਤੱਕ ਟੋਰੀ ਸਰਕਾਰ ਸਰਕਾਰੀ ਸੇਵਾਵਾਂ ਵਿੱਚ ਕੱਟ ਲਾਵੇਗੀ ਜਿਸਦਾ ਲੋਕਾਂ ਨੂੰ ਦੁਖ ਲੱਗੇਗਾ ਅਤੇ ਬੱਜਟ ਵੀ ਪੇਸ਼ ਹੋ ਜਾਵੇਗਾ।
ਇਗਨਾਟਿਫ ਦੇ ਸਾਬਕਾ ਪ੍ਰਿੰਸੀਪਲ ਸਕੱਤਰ ਡੈਨ ਬਰੌਕ ਦਾ ਕਹਿਣਾ ਹੈ ਕਿ ਲਿਬਰਲ ਚਾਹੁੰਦੇ ਹੋਏ ਵੀ ਚੋਣਾਂ ਨਹੀਂ ਕਰਵਾ ਸਕਣਗੇ। ਇੱਕ ਟੀ.ਵੀ ਮੁਲਾਕਾਤ ਵਿੱਚ ਉਹਨਾਂ ਕਿਹਾ ਕਿ ਇਹ ਸਰਕਾਰ ਕਿਸੇ ਵੱਡੇ ਸਕੈਂਡਲਵਿੱਚ ਫਸਣ ਤੇ ਹੀ ਡਿੱਗ ਸਕਦੀ ਹੈ ਜੋ ਕਿ ਸਿਆਸਤ ਵਿੱਚ ਕਦੇ ਵੀ ਵਾਪਰ ਸਕਦਾ ਹੈ। ਉਹਨਾਂ ਕਿਹਾ ਕਿ ਇਸ ਸਰਕਾਰ ਨੂੰ ਡੇਗਣ ਲਈ ਸਾਰੀਆਂ ਤਿੰਨਾਂ ਪਾਰਟੀਆਂ ਦਾ ਇੱਕਜੁੱਟ ਹੋਣਾ ਬਹੁਤ ਲਾਜ਼ਮੀ ਹੈ ਜੋ ਇਸ ਸਮੇਂ ਬਹੁਤ ਹੀ ਮੁਸ਼ਕਿਲ ਲੱਗ ਰਿਹਾ ਹੈ।
ਬਰੌਕ ਦਾ ਮੰਨਣਾ ਹੈ ਕਿ ਅਗਲੀਆਂ ਚੋਣਾਂ ਘੱਟੋ-ਘੱਟ ਡੇਢ ਸਾਲ ਤੱਕ ਹੋਣਗੀਆਂ। ਪਬਲਿਕ ਪੋਲਾਂ ਵਿੱਚ ਲਿਬਰਲ ਪਾਰਟੀ 30 ਫੀਸਦੀ ਤੇ ਚੱਲ ਰਹੀ ਹੈ ਜੋ ਚੋਣਾਂ ਕਰਾਉਣ ਤੱਕ ਤਾਂ ਠੀਕ ਹੈ ਪਰ ਚੋਣ ਕੰਪੇਨ ਵਿੱਚ ਇਸ ਦਾ ਕੋਈ ਜਿ਼ਆਦਾ ਮਾਇਨਾ ਨਹੀਂ ਹੈ। ਲਿਬਰਲ ਨੇ ਪਿਛਲੀ ਬਹਾਰ ਰੁੱਤ ਦੇ 10 ਫੀਸਦੀ ਦੇ ਵਕਫੇ ਨੂੰ ਤੰਗ ਕਰਕੇ 3 ਫੀਸਦੀ ਤੱਕ ਲੈ ਆਂਦਾ ਹੈ। ਪਰ ਟੋਰੀ ਪਾਰਟੀ ਭਾਵੇਂ ਥੋੜ੍ਹਾ ਹੀ ਸਹੀ ਪਰ ਲਿਬਰਲ ਨਾਲੋਂ ਅੱਗੇ ਹੈ।
ਇਗਨਾਟਿਫ ਦਾ ਕਹਿਣਾ ਹੈ ਕਿ ਪਤਝੜ ਸੈਸ਼ਨ ਲਈ ਪਾਰਟੀ ਕੋਲ ਮਜਬੂਤ ਮੁੱਦੇ ਹਨ ਜਿਸ ਲਈ ਉਹ ਸਰਕਾਰ ਤੇ ਦਬਾਅ ਬਣਾਈ ਰੱਖਣਗੇ। ਉਹਨਾਂ ਕਿਹਾ ਕਿ ਕਿਸੇ ਨੂੰ ਵੀ ਉਹਨਾਂ ਦੀ ਇੱਛਾ ਜਾਂ ਉਹਨਾਂ ਨੂੰ ਘੱਟ ਨਹੀਂ ਸਮਝਣਾ ਚਾਹੀਦਾ। ਇਗਨਾਟਿਫ ਦੇ ਗਰਮ ਰੁੱਤ ਦੇ ਬੱਸ ਟੂਰ ਨੇ ਲਿਬਰਲ ਪਾਰਟੀ ਅਤੇ ਇਸ ਦੀ ਗਰਾਸ ਰੂਟ ਵਿੱਚ ਨਵੀਂ ਰੂਹ ਫੂਕਣ ਵਿੱਚ ਕੁਝ ਸਹਾਇਤਾ ਕੀਤੀ ਹੈ। ਬਰੌਕ ਦਾ ਕਹਿਣਾ ਹੈ ਕਿ ਇਸ ਸਮੇਂ ਆਮ ਸਮਰਥਕ ਨੂੰ ਨਜ਼ਰ ਅੰਦਾਜ਼ ਕਰਨਾ ਬਹੁਤ ਹੀ ਮਹਿੰਗਾ ਪੈ ਸਕਦਾ ਹੈ। ਉਹਨਾਂ ਕਿਹਾ ਕਿ ਏਹੀ ਲੋਕ ਹਨ ਜੋ ਘਰ-ਘਰ ਵੋਟਾਂ ਮੰਗਦੇ ਹਨ, ਏਹੀ ਲੋਕ ਹਨ ਜੋ ਚੋਣਾਂ ਵਾਲੇ ਦਿਨ ਵੋਟਾਂ ਘਰੋਂ ਕੱਢ ਕੇ ਲਿਆਉਂਦੇ ਹਨ। ਬਰੌਕ ਅਨੁਸਾਰ ਇਗਨਾਟਿਫ ਦਾ ਗਰਮ ਰੁੱਤ ਦਾ ਬੱਸ ਟੂਰ ਸਫਲ ਰਿਹਾ ਹੈ। ਉਹਨਾਂ ਕਿਹਾ ਕਿ ਇਗਨਾਟਿਫ ਦੀ ਛਵੀ ਲਈ ਬਹੁਤ ਹੀ ਸਹਾਈ ਹੋਇਆ ਹੈ। ਇਸ ਨਾਲ਼ ਇਹ ਵੀ ਸਾਹਮਣੇ ਆਇਆ ਹੈ ਕਿ ਇਸ 62 ਸਾਲਾ ਵਿਅਕਤੀ ਵਿੱਚ ਕੰਪੇਨ ਕਰਨ ਦੀ ਸਮਰਥਾ ਵੀ ਹੈ।
ਲਿਬਰਲ ਨੇਤਾ ਨੇ ਲਗਪਗ ਸਾਰੀ ਗਰਮ ਰੁੱਤ ਬੱਸ ਵਿੱਚ ਗੁਜ਼ਾਰੀ ਹੈ, ਕੋਈ 40,000 ਕਿਲੋਮੀਟਰ ਦਾ ਸਫਰ ਤੈਅ ਕੀਤਾ ਹੈ, 10 ਸੂਬਿਆਂ ਅਤੇ 2 ਟੈਰੀਟਿਰੀ ਵਿੱਚ 130 ਸਮਾਗਮਾਂ ਵਿੱਚ ਹਿੱਸਾ ਲਿਆ ਹੈ ਅਤੇ ਤਕਰੀਬਨ 11000 ਵੋਟਰਾਂ ਨਾਲ਼ ਹੱਥ ਮਿਲਾਇਆ ਹੈ।
ਇਗਨਾਟਿਫ ਦਾ ਕਹਿਣਾ ਹੈ ਕਿ ਉਹਨਾਂ ਨੇ ਇਸ ਟੂਰ ਦਾ ਬਹੁਤ ਅਨੰਦ ਮਾਣਿਆ ਹੈ ਅਤੇ ਉਹ ਪਤਝੜ੍ਹ ਵਿੱਚ ਵੀ ਇਸ ਨੂੰ ਜਾਰੀ ਰੱਖਣ ਦੇ ਚਾਹਵਾਨ ਹਨ ਅਤੇ ਉਹਨਾਂ ਥਾਵਾਂ ਦਾ ਦੌਰਾ ਕਰਨਾ ਚਾਹੁੰਦੇ ਹਨ ਜਿੱਥੇ ਉਹ ਇਸ ਟਰਿੱਪ ਦਰਮਿਆਨ ਨਹੀਂ ਜਾ ਸਕੇ ਅਤੇ ਆਪਣੇ ਚੋਣ ਪ੍ਰੋਗਰਾਮ ਬਾਰੇ ਜਾਣਕਾਰੀ ਦੇ ਸਕਦੇ ਹਨ।

ਅਦਾਕਾਰਾ ਕਾਜੋਲ ਨੇ ਹਾਲ ਹੀ ਵਿੱਚ ਆਪਣਾ ਜਨਮ ਦਿਨ ਮਨਾਇਆ ਹੈ ਅਤੇ ਉਸ ਦੇ ਪਤੀ ਅਜੇ ਦੇਵਗਨ ਨੂੰ ਹੁਣੇ-ਹੁਣੇ ‘ਵਨਸ ਅਪੋਨ ਏ ਟਾਈਮ ਇਨ ਮੁੰਬਈ’ ਵਿੱਚ ਵੱਡੀ ਸਫਲਤਾ ਮਿਲੀ ਹੈ। ਕਾਜੋਲ ਮੁਤਾਬਕ ਉਹ ਆਪਣੇ ਪਤੀ ਦੀ ਸਫਲਤਾ ਦਾ ਥੋੜ੍ਹਾ ਸਿਹਰਾ ਆਪਣੇ ਸਿਰ ਵੀ ਬੰਨ੍ਹ ਸਕਦੀ ਹੈ। ਜਦੋਂ ਉਸ ਨੂੰ ਅਜੇ ਦੀ ਅਦਾਕਾਰੀ ਵਿੱਚ ਬਦਲਾਅ ਬਾਰੇ ਪੁੱਛਿਆ ਗਿਆ ਤਾਂ ਮਾਣ ਅਤੇ ਖੁਸ਼ੀ ਨਾਲ ਕਿਹਾ ਕਿ ਤੁਹਾਨੂੰ ਨਹੀਂ ਲੱਗਦਾ ਕਿ ਮੈਂ ਅਜੇ ਨੂੰ ਬਹੁਤ ਚੰਗੀ ਤਰ੍ਹਾਂ ਟ੍ਰੇਂਡ ਕੀਤਾ ਹੈ।
ਕਾਜੋਲ ਨੇ ਕਿਹਾ ਕਿ ਅਸਲ ਵਿੱਚ ਇਸ ਗੱਲ ਨਾਲ ਬਹੁਤ ਫਰਕ ਪੈਂਦਾ ਹੈ ਕਿ ਤੁਸੀਂ ਕਿਸ ਨਾਲ ਵਿਆਹ ਕਰ ਰਹੇ ਹੋ। ਵਿਆਹ ਵਿੱਚ ਪ੍ਰਭਾਵ ਦੋਵਾਂ ਤਰੀਕਿਆਂ ਨਾਲ ਕੰਮ ਕਰਦਾ ਹੈ। ਮੇਰੇ ਕੈਰੀਅਰ ਵਿੱਚ ਜੋ ਕੁਝ ਹੋਇਆ, ਉਸ ਲਈ ਮੈਂ ਆਪਣੇ ਪਤੀ ਨੂੰ ਬਹੁਤ ਜ਼ਿੰਮੇਵਾਰ ਮੰਨਦੀ ਹਾਂ ਅਤੇ ਉਸ ਦੀ ਸਫਲਤਾ ਵਿੱਚ ਮੇਰਾ ਵੀ ਥੋੜ੍ਹਾ ਕੁ ਹੱਥ ਹੈ ਅਤੇ ਅਜੇ ਨੂੰ ਵੀ ਇਸ ‘ਤੇ ਕੋਈ ਇਤਰਾਜ਼ ਨਹੀਂ ਹੈ।
ਜ਼ਿਕਰ ਯੋਗ ਹੈ ਕਿ ਕਾਜੋਲ 5 ਅਗਸਤ ਨੂੰ 35 ਸਾਲਾਂ ਦੀ ਹੋ ਗਈ ਹੈ। ਉਸ ਨੇ ਕਿਹਾ ਕਿ ਜਦੋਂ ਅਜੇ ਅਤੇ ‘ਵਨਸ ਅਪੋਨ ਏ ਟਾਈਮ ਇਨ ਮੁੰਬਈ’ ਦੀ ਟੀਮ ਨੇ ਪਹਿਲਾਂ ਤਿੰਨ ਦਿਨ ਦੀ ਬਾਕਸ ਆਫਿਸ ਕਾਰਗੁਜ਼ਾਰੀ ਦੇਖੀ ਤਾਂ ਉਹ ਖੁਸ਼ੀ ਨਾਲ ਖੀਵੇ ਹੋ ਗਏ।
ਕਾਜੋਲ ਮੁੜ ਗਰਭਵਤੀ ਹੈ ਅਤੇ ਗਰਭ ਅਵਸਥਾ ਦੌਰਾਨ ‘ਵੀ ਆਰ ਫੈਮਿਲੀ’ ਦੀ ਸ਼ੂਟਿੰਗ’ਤੇ ਹੈ। ਇਸ ਮੌਕੇ ਉਸ ਦਾ ਕਹਿਣਾ ਹੈ ਕਿ ਅੰਤਿਮ ਗਾਣੇ ਜੈਲ ਹਾਊਸ ਰਾਕ ਦੀ ਸ਼ੂਟਿੰਗ ਦੌਰਾਨ ਹੀ ਉਹ ਗਰਭਵਤੀ ਸੀ।

ਬਾਲੀਵੁੱਡ ਦੀ ਸਦਾ ਬਹਾਰ ਅਦਾਕਾਰਾ ਰੇਖਾ ਹੁਣ ਛੋਟੇ ਪਰਦੇ ‘ਤੇ ਆਪਣੀ ਅਦਾਕਾਰੀ ਦੇ ਜੌਹਰ ਦਿਖਾਉਣ ਆ ਰਹੀ ਹੈ। ਉਮਰਾਓ ਜਾਨ ਵਰਗੀਆਂ ਕਈ ਖੂਬਸੂਰਤ ਫਿਲਮਾਂ ਵਿੱਚ ਆਪਣੇ ਹੁਨਰ ਦਾ ਜਲਵਾ ਦਿਖਾਉਣ ਤੋਂ ਬਾਅਦ ਹੁਣ ਦਰਸ਼ਕ ਇਸ ਖੂਬਸੂਰਤ ਅਭਿਨੇਤਰੀ ਨੂੰ ਫਿਲਮਕਾਰ ਹੈਰੀ ਬਾਵੇਜਾ ਦੇ ਪੇਂਡੂ ਪਿੱਠ ਭੂਮੀ ‘ਤੇ ਆਧਾਰਤ ਲੜੀਵਾਰ ਵਿੱਚ ਦੇਖ ਸਕਣਗੇ, ਜਿਸ ਦੀ ਤਿਆਰੀ ਬੜੇ ਜ਼ੋਰ-ਸ਼ੋਰ ਨਾਲ ਚੱਲ ਰਹੀ ਹੈ।
ਉਮੀਦ ਕੀਤੀ ਜਾਂਦੀ ਹੈ ਕਿ ਇਸ ਲੜੀਵਾਰ ਦਾ ਪ੍ਰਸਾਰਨ ਸਹਾਰਾ ਵੰਨ ਚੈਨਲ ‘ਤੇ 10 ਅਕਤੂਬਰ ਤੋਂ ਸ਼ੁਰੂ ਹੋਵੇਗਾ। ਸਹਾਰਾ ਵੰਨ ਟੀ ਵੀ ਦੀ ਇਹ ਹਮੇਸ਼ਾ ਕੋਸ਼ਿਸ਼ ਰਹੀ ਹੈ ਕਿ ਕਿਸੇ ਨਾ ਕਿਸੇ ਵੱਡੇ ਪਰਦੇ ਦੇ ਕਲਾਕਾਰਾਂ ਨੂੰ ਛੋਟੇ ਪਰਦੇ ‘ਤੇ ਦਿਖਾਇਆ ਜਾਵੇ। ਇਸ ਤੋਂ ਪਹਿਲਾਂ ਸਹਾਰਾ ਵੰਨ ਵਾਲੇ ਹੇਮਾ ਮਾਲਿਨੀ, ਸ੍ਰੀਦੇਵੀ, ਰਵੀਨਾ ਟੰਡਨ ਅਤੇ ਕਰਿਸ਼ਮਾ ਕਪੂਰ ਨੂੰ ਛੋਟੇ ਪਰਦੇ ‘ਤੇ ਲਿਆਉਣ ਵਿੱਚ ਕਾਮਯਾਬ ਰਹੇ।
ਰੇਖਾ ਖੁਦ ਇਸ ਲੜੀਵਾਰ ਦੀ ਕਹਾਣੀ ਤੋਂ ਬਹੁਤ ਉਤਸ਼ਾਹਤ ਹੈ। ਉਸ ਦਾ ਕਹਿਣਾ ਹੈ ਕਿ ‘ਮੇਰੀ ਇਹ ਪੂਰੀ ਕੋਸ਼ਿਸ਼ ਰਹੇਗੀ ਕਿ ਮੈਂ ਇਸ ਲੜੀਵਾਰ ਵਿੱਚ ਵਧੀਆ ਕਿਰਦਾਰ ਨਿਭਾ ਸਕਾਂ। ਇਸ ਲੜੀਵਾਰ ਵਿੱਚ ਮੇਰੇ ਨਾਲ ਕਬੀਰ ਬੇਦੀ ਜਿਹੇ ਵਧੀਆ ਕਲਾਕਾਰ ਵੀ ਕੰਮ ਕਰ ਰਹੇ ਹਨ। ਮੈਂ ਕੋਸ਼ਿਸ਼ ਕਰਾਂਗੀ ਕਿ ਜੋ ਵਿਸ਼ਵਾਸ ਮੇਰੇ ‘ਤੇ ਹੈਰੀ ਬਾਵੇਜਾ ਅਤੇ ਸਹਾਰਾ ਵੰਨ ਨੇ ਬਣਾਇਆ ਹੈ ਮੈਂ ਉਨ੍ਹਾਂ ਦੀ ਕਸੌਟੀ ‘ਤੇ ਪੂਰੀ ਉਤਰ ਸਕਾਂ।’

ਅਭਿਨੇਤਾ ਅਨਿਲ ਕਪੂਰ ਦੀ ਬੇਟੀ ਸੋਨਮ ਕਪੂਰ ਦੀਆਂ ਹੁਣ ਤੱਕ ਆਈਆਂ ਦੋਵੇਂ ਫਿਲਮਾਂ ‘ਸਾਂਵਰੀਆ’ ਤੇ ‘ਦਿੱਲੀ-5′ ਬਾਕਸ ਆਫਿਸ ‘ਤੇ ਕੋਈ ਕਮਾਲ ਨਹੀਂ ਦਿਖਾ ਸਕੀਆਂ, ਪਰ ਇਸ ਨਾਲ ਉਸ ਦੇ ਕੈਰੀਅਰ ਨੂੰ ਕੋਈ ਫਰਕ ਨਹੀਂ ਪਿਆ। ਸੋਨਮ ਅੱਜ ਜਿੱਥੇ ਵਿਗਿਆਪਨ ਜਗਤ ਦੀ ਚਹੇਤੀ ਨਾਇਕਾ ਬਣੀ ਹੋਈ ਹੈ, ਉਥੇ ਉਹ ਬਾਲੀਵੁੱਡ ਦੇ ਨਿਰਮਾਤਾ-ਨਿਰਦੇਸ਼ਕਾਂ ਦੀ ਵੀ ਪਸੰਦੀਦਾ ਹੀਰੋਇਨ ਬਣੀ ਹੋਈ ਹੈ। ਸੋਨਮ ਕੋਲ ਇਸ ਸਮੇਂ ਅੱਧੀ ਦਰਜਨ ਤੋਂ ਵਧੇਰੇ ਵਧੀਆ ਫਿਲਮਾਂ ਹਨ।
ਸੋਨਮ ਨੇ ਕੈਟਰੀਨਾ ਕੈਫ ਤੋਂ ਅਕਸ਼ੈ ਕੁਮਾਰ ਵਾਲੀ ਫਿਲਮ ‘ਤੀਸ ਮਾਰ ਖਾਂ’ ਵਾਲਾ ਬਦਲਾ ਲੈ ਲਿਆ ਹੈ। ਨਿਰਦੇਸ਼ਕ ਅਨੀਸ ਬਜਮੀ ਦੀ ਇਸ ਫਿਲਮ ਵਿੱਚ ਉਹ ਅਕਸ਼ੈ ਕੁਮਾਰ ਦੇ ਆਪੋਜਿਟ ਅਭਿਨੈ ਕਰ ਰਹੀ ਹੈ। ‘ਥੈਂਕ ਯੂ’ ਵਿੱਚ ਡਬਲ ਰੋਲ ਕਰ ਰਹੀ ਸੋਨਮ ਇਸ ਵਿੱਚ ਟੈਨਿਸ ਖਿਡਾਰਨ ਸਾਨੀਆ ਮਿਰਜ਼ਾ ਦਾ ਕਿਰਦਾਰ ਨਿਭਾਏਗੀ ਤੇ ਉਹ ਇਸ ਫਿਲਮ ਨੂੰ ਲੈ ਕੇ ਖੁਸ਼ ਨਜ਼ਰ ਆ ਰਹੀ ਹੈ।